കോഴിക്കോട് : നഗരത്തിലെ ടര്ഫുകള് കേന്ദ്രീകരിച്ച് രാത്രി സിന്തറ്റിക് ലഹരി വില്പന നടക്കുന്നുവെന്ന വിവരത്തിന്റെ അടിസ്ഥാനത്തില് നടത്തിയ പരിശോധനയില് യുവാവ് അറസ്റ്റില്. മാത്തോട്ടം സ്വദേശി മോട്ടി മഹലില് റോഷന് (22) ആണ് 0.960 ഗ്രാം എം.ഡി.എം.എയുമായി പിടിയിലായത്. മാത്തോട്ടം സ്വദേശികളായ രണ്ടുപേരെ എം.ഡി.എം.എയുമായി നഗരത്തിലെ ഹോട്ടല്മുറിയില്നിന്ന് കഴിഞ്ഞ ദിവസം ഡന്സാഫ് പിടികൂടിയിരുന്നു.
ഇവരെ ചോദ്യം ചെയ്തപ്പോഴാണ് നഗരത്തിലെ ടര്ഫുകള് കേന്ദ്രീകരിച്ച് ലഹരി വില്പന നടത്തുന്ന റോഷനെക്കുറിച്ചുള്ള വിവരം ലഭിച്ചത്. രാത്രി കളിക്കാനെന്ന വ്യാജേന ടര്ഫുകള്ക്ക് സമീപമെത്തി യുവാക്കളെ വലയിലാക്കുകയാണ് ഇയാളുടെ രീതി. ഡെപ്യൂട്ടി പോലീസ് കമീഷണര് ആമോസ് മാമ്മന്റെ നിര്ദേശത്തെ തുടര്ന്ന് നാര്കോട്ടിക് സെല് അസി.കമീഷണര് പി.പ്രകാശന്റെ നേതൃത്വത്തിലുള്ള ഡിസ്ട്രിക്ട് ആന്ഡി നാര്കോട്ടിക് സ്പെഷല് ആക്ഷന് ഫോഴ്സും ഫറോക്ക് അസി.കമീഷണര് എ.എം സിദ്ദീഖിന്റെ നേതൃത്വത്തിലുള്ള പന്നിയങ്കര പോലീസും നടത്തിയ പരിശോധനയിലാണ് പ്രതി പിടിയിലായത്. ഡന്സാഫ് അസി.എസ്ഐ മനോജ് എടയേടത്ത്, സീനിയര് സിപിഒ കെ.അഖിലേഷ്, സിപിഒമാരായ കാരയില് സുനോജ്, അര്ജുന് അജിത്ത്, പന്നിയങ്കര സബ് ഇന്സ്പെക്ടര് മുരളീധരന് എ.എസ്.ഐ സാജന് പുതിയോട്ടില് എന്നിവര് അന്വേഷണ സംഘത്തിലുണ്ടായിരുന്നു.