മാന്നാര്‍ : വിവാഹം ആശുപത്രി തുടങ്ങിയ ആവശ്യങ്ങള്‍ക്കെന്ന വ്യാജേന പരിചയക്കാരുടെ വാഹനങ്ങള്‍ എടുക്കുകയും അവ മറിച്ചു വില്‍ക്കുകയും ചെയ്തയാളിനെ മാന്നാര്‍ പോലീസ് അറസ്റ്റ് ചെയ്തു. എണ്ണക്കാട് പെരിങ്ങലിപ്പുറം തെക്കും മുറിയില്‍ ചിറമേല്‍ മഹേഷ്‌ (35) ആണ് അറസ്റ്റിലായത്. എണ്ണക്കാട് സ്വദേശികളായ ആന്‍സി കമലേഷ്, സൗമ്യ കൃഷ്ണന്‍, തഴക്കര സ്വദേശിയായ മനു മാത്യു എന്നിവരുടെ രണ്ട് സ്വിഫ്റ്റ് കാര്‍, ഒരു എര്‍ട്ടിഗ കാര്‍ എന്നിവ 2021ഓഗസ്റ്റ്, നവംബര്‍ മാസങ്ങളിലായി പല ആവശ്യങ്ങള്‍ പറഞ്ഞ് മഹേഷ്‌ കൊണ്ടുപോയി. പിന്നീട് പലതവണ ആവശ്യപ്പെട്ടിട്ടും തികികെ ലഭിച്ചില്ല. ഉടമകള്‍ മാന്നാര്‍ പോലീസ് സ്റ്റേഷനില്‍ പരാതി നല്‍കിയതിനെത്തുടര്‍ന്ന് ജനുവരി 31ന് വാഹനങ്ങള്‍ തിരികെ നല്‍കാമെന്ന വ്യവസ്ഥയുണ്ടാക്കി.
കരാര്‍ തീയതിയിലും വാഹനങ്ങള്‍ കിട്ടാതെ വന്നപ്പോള്‍ പോലീസ് നടത്തിയ അന്വേഷണത്തില്‍ വാഹനങ്ങള്‍ തമിഴ്നാട് കമ്പംമേട്ടില്‍ വില്പന നടത്തിയെന്നറിയുകയും മഹേഷിനെ പോലീസ് അവിടെനിന്ന് അറസ്റ്റ് ചെയ്യുകയുമായിരുന്നു. വാഹനങ്ങളില്‍ ഒരെണ്ണം അവിടെ നിന്ന് കണ്ടെത്തുകയും ചെയ്തു. മാന്നാര്‍ പോലിസ് ഇന്‍സ്‌പെക്ടര്‍ എസ്.എച്ച്‌.ഒ ജി.സുരേഷ് കുമാറിന്റെ നേതൃത്വത്തില്‍ എസ്.ഐമാരായ അംഗതന്‍, ശ്രീകുമാര്‍, അഡിഷണല്‍ എസ്.ഐ ബിന്ദു, സീനിയര്‍ സിവില്‍ പോലീസ് ഓഫീസര്‍ സജീവ്, സിവില്‍ പോലീസ് ഓഫീസര്‍ അരുണ്‍ എന്നിവരടങ്ങിയ പൊലീസ് സംഘമാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. മറ്റ് രണ്ട് വാഹനങ്ങള്‍ക്കായി അന്വേഷണം ഊര്‍ജിതമാക്കിയിട്ടുണ്ടെന്ന് മാന്നാര്‍ പോലീസ് അറിയിച്ചു.
