വലിയതുറ : ഗര്ഭിണിയേയും അമ്മയേയും തടഞ്ഞുവച്ച് ആക്രമിച്ചത് തടയാനെത്തിയ വനിതാ ട്രാഫിക് വാര്ഡന് നേരെ ആക്രമണം. ശംഖുമുഖത്തെ ട്രാഫിക് വാര്ഡനായ ദിവ്യയ്ക്ക് നേരെയാണ് ആക്രമണമുണ്ടായത്. ഇവരെ ബൈക്കിടിച്ച് പരിക്കേല്പ്പിക്കാന് നോക്കിയ പ്രതിയെ പോലീസ് അറസ്റ്റ് ചെയ്തു. ശംഖുമുഖം രാജീവ് നഗര് ട്രിനിറ്റി ഹൗസില് ആന്റണിയെയാണ് വലിയതുറ പോലീസ് അറസ്റ്റ് ചെയ്തത്. ഞായറാഴ്ച വൈകിട്ടായിരുന്നു സംഭവം. വലിയവേളി സ്വദേശിനിയായ ഷാലറ്റും മകളായ ലിബിതയും ശംഖുമുഖത്ത് എത്തിയിരുന്നു. ഇവിടെ പാര്ക്കിങ് ഗ്രൗണ്ടില് വാഹനം പാര്ക്ക് ചെയ്യുന്നതിനിടെ ഇവരുടെ കാര് ആന്റണിയുടെ ബൈക്കില് തട്ടിയെന്നാരോപിച്ചാണ് ഷാലറ്റിനേയും ലിബിതയേയും അസഭ്യം പറയുകയും ആക്രമിക്കാനും ശ്രമിച്ചത്.
ഈ സമയം ഡ്യൂട്ടിയിലുണ്ടായിരുന്ന ദിവ്യ ഓടിയെത്തി കയ്യേറ്റം തടഞ്ഞു. ഇതില് പ്രകോപിതനായ ആന്റണി ദിവ്യയുടെ കാലില് ബൈക്കിടിച്ച് പരിക്കേല്പ്പിക്കുകയായിരുന്നു. ഇവര് നല്കിയ പരാതിയുടെ അടിസ്ഥാനത്തിലാണ് ആന്റണിയെ അറസ്റ്റ് ചെയ്തത്. ബലപ്രയോഗത്തിലൂടെയാണ് ഇയാളെ പിടികൂടിയതെന്ന് പോലീസ് വ്യക്തമാക്കി. വലിയതുറ, തുമ്പ, വട്ടിയൂര്ക്കാവ് തുടങ്ങിയ സ്ഥലങ്ങളില് ഇയാള്ക്കെതിരെ നിരവധി കേസുകളുണ്ട്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
