കിഴക്കമ്പലം : കിറ്റെക്സില് ഇതരസംസ്ഥാന തൊഴിലാളികള് പോലീസിനെ ആക്രമിച്ച കേസില് കൂടുതല് അറസ്റ്റ് ഇന്ന് ഉണ്ടായേക്കും. അറസ്റ്റിലായ 164 പേര്ക്കുപുറമേ കൂടുതല് പ്രതികളുണ്ടെന്നാണ് അന്വേഷണ സംഘത്തിന്റെ നിഗമനം. 300ഓളം പേര് പ്രതികളാകുമെന്നാണ് സൂചന. ഇതരസംസ്ഥാന തൊഴിലാളികള്ക്കിടയിലെ ലഹരി ഉപയോഗത്തെക്കുറിച്ച് വിശദമായ അന്വേഷണവും പോലീസ് നടത്തുന്നുണ്ട്. പെരുമ്പാവൂര് എ.എസ്.പി. അനുജ് പലിവാലിന്റെ നേതൃത്വത്തില് 19 അംഗ സംഘമാണ് അന്വേഷണം നടത്തുന്നത്. മണിപ്പൂര്, ജാര്ഖണ്ഡ്, അസം സംസ്ഥാനങ്ങളിലുളളവരാണ് റിമാന്ഡിലുളള ഭൂരിഭാഗം പേരും. ഇവരുടെ മേല്വിലാസവും മറ്റ് വിശദാംശങ്ങളും പരിശോധിക്കുന്നുണ്ട്.
പോലീസിനു നേരെ അക്രമമുണ്ടായ സാഹചര്യം, സംഘര്ഷത്തിലേക്ക് നയിച്ച വിഷയം എന്നിവയില് വിശദമായ അന്വേഷണം നടത്തും. അറസ്റ്റിലായവരുടെ മൊബൈല് ഫോണുകളില് റെക്കോര്ഡ് ചെയ്ത ദൃശ്യങ്ങള് ഉള്പ്പടെ പരിശോധിച്ചാകും കൂടുതല് അറസ്റ്റുണ്ടാവുക. ഇവരുടെ ലഹരി ഉപയോഗം സംബന്ധിച്ചും അന്വേഷണം നടത്തും. കിറ്റെക്സില് ക്രിസ്മസ് രാത്രിയിലുണ്ടായ സംഘര്ഷം നിയന്ത്രിക്കാനെത്തിയ പോലീസുകാരാണ് ആക്രമിക്കപ്പെട്ടത്. സംഭവത്തില് എട്ട് പോലീസുകാര്ക്ക് പരിക്കേറ്റിരുന്നു.
