മലപ്പുറം: കരിപ്പൂര് വിമാനത്താവളത്തില് വീണ്ടും സ്വര്ണവേട്ട. രഹസ്യമായി വിമാനത്താവളത്തിന് പുറത്ത് കടത്താന് ശ്രമിച്ച 91 ലക്ഷം രൂപയുടെ സ്വര്ണം പിടികൂടി.സംഭവത്തില് ഒരാളെ പോലീസ് പിടികൂടിയിട്ടുണ്ട്. മലപ്പുറം ചട്ടിപ്പറമ്പ് സ്വദേശി റിയാസ് മോനാണ് പിടിയിലായത്. വിമാനത്താവളത്തിലെ സുരക്ഷ പരിശോധനയ്ക്ക് ശേഷം പുറത്തിറങ്ങിയപ്പോഴായിരുന്നു ഇയാളെ പിടികൂടിയത്. മ്യൂസിക് സിസ്റ്റത്തില് ഒളിപ്പിച്ചായിരുന്നു ഇയാള് സ്വര്ണം കടത്താന് ശ്രമിച്ചത്.
സുരക്ഷാ പരിശോധനയ്ക്ക് ശേഷം പുറത്തിറങ്ങിയ റിയാസ്മോനെ കണ്ട പോലീസിന് സംശയം തോന്നിയിരുന്നു. ഇതേ തുടര്ന്ന് കസ്റ്റഡിയില് എടുത്ത് പരിശോധിക്കുകയായിരുന്നു. മ്യൂസിക് പ്ലെയറിന്റെ ബാറ്ററി കേസിനകത്ത് ബാറുകളായി ഒളിപ്പിച്ച നിലയിലായിരുന്നു സ്വര്ണം. ജിദ്ദയില് നിന്നും ഇന്ഡിഗോ വിമാനത്തിലാണ് ഇയാള് കരിപ്പൂരില് എത്തിയത്. കള്ളക്കടത്തിനായി സ്വര്ണക്കടത്ത് സംഘങ്ങള് പുതു വഴികള് തേടുകയാണ്. പ്രധാനമായും മലദ്വാരത്തില് ഒളിപ്പിച്ചാണ് സംഘങ്ങള് സ്വര്ണം കടത്താറുള്ളത്. എന്നാല് ഇത് സ്ഥിരമായി പിടിക്കപ്പെടുന്ന സാഹചര്യത്തിലാണ് വസ്തുക്കളില് ഒളിപ്പിച്ച് സ്വര്ണം കടത്തുന്നത്.
