അടൂർ : അടൂരിൽ 2 കിലോ കഞ്ചാവുമായി യുവാവ് അറസ്റ്റിൽ. ക്രിസ്മസ്–പുതുവത്സര സ്പെഷൽ ഡ്രൈവുമായി ബന്ധപ്പെട്ട് എക്സൈസ് സ്ക്വാഡ് നടത്തിയ പരിശോധനയിൽ അടൂരിൽ 2 കിലോ കഞ്ചാവുമായി യുവാവ് അറസ്റ്റിൽ. പത്തനംതിട്ട മുണ്ടുകോട്ടക്കൽ ഉഴത്തിൽതടത്തിൽ കെ. ബിജുവാണ് (30) അറസ്റ്റിലായത്. പാലക്കാട്ടു നിന്ന് കഞ്ചാവുമായി അടൂർ വഴി പത്തനംതിട്ടയിലേക്ക് പോകാനായി അടൂർ കെഎസ്ആർടിസി ബസ് സ്റ്റാൻഡിൽ എത്തിയപ്പോഴാണ് തിരുവനന്തപുരം എക്സൈസ് കമ്മിഷണർ സ്ക്വാഡിന്റെയും പത്തനംതിട്ട എക്സൈസ് സ്പെഷൽ സ്ക്വാഡിന്റെയും പിടിയിലായത്.
ഇന്നലെ വൈകീട്ട് 4നാണ് അറസ്റ്റ്. പരിശോധന നടത്തിവരവെ കായംകുളം ബസിൽ അടൂർ സ്റ്റാൻഡിലിറങ്ങിയ ബിജുവിനെ സംശയം തോന്നി പരിശോധിച്ചപ്പോഴാണ് കയ്യിലുണ്ടായിരുന്ന ബാഗിൽ നിന്ന് കഞ്ചാവ് ലഭിച്ചത്. ചെറിയ പൊതികളിലാക്കി ഒരു പൊതിക്ക് 500 രൂപ വെച്ചാണ് ഇയാൾ വിൽപന നടത്തുന്നതെന്നാണ് വിവരം ലഭിച്ചത്. കമ്മീഷണർ എക്സൈസ് സ്ക്വാഡിൽപ്പെട്ട ഇൻസ്പെക്ടർ വൈശാഖ് പിള്ള, അസിസ്റ്റന്റ് എക്സൈസ് ഇൻസ്പെക്ടർ ബിജു ഫിലിപ്, അസീസ്, പത്തനംതിട്ട സർക്കിൾ ഇൻസ്പെക്ടർ എൽ. ഷിജു, സിവിൽ എക്സൈസ് ഓഫീസർമാരായ വിമൽകുമാർ, രാജേഷ്, ബിനീഷ് പ്രഭാകർ, ഷിബു എന്നിവരുടെ നേതൃത്വത്തിലാണ് പരിശോധന നടത്തിയത്.
