മഹാരാഷ്ട്ര: മഹാരാഷ്ട്രയിലെ ചന്ദാര്‍പൂര്‍ നഗരത്തില്‍ പ്രഭാത സവാരിക്കിടെ കടുവയെ കണ്ട് പേടിച്ച്‌ ഹൃദയാഘാതം വന്ന് യുവാവ് മരിച്ചു. വ്യാഴാഴ്ചയാണ് സംഭവം. പ്രവീണ്‍ മറാത്തെ എന്നയാളാണ് മരിച്ചത്. പ്രഭാത സവാരിക്കിടെയാണ് പ്രവീണ്‍ കടുവ റോഡ് മുറിച്ചു കടക്കുന്നതായി കണ്ടത്. പെട്ടെന്ന് കടുവയെ കണ്ടതിലുള്ള ഭയം മൂലം ഹൃദയാഘാതം സംഭവിച്ചാണ് ഇയാള്‍ മരിച്ചതെന്ന് റിപ്പോര്‍ട്ടില്‍ പറയുന്നു. വനത്തിന് സമീപം റോഡരികില്‍ കാര്‍ പാര്‍ക്ക് ചെയ്തതിന് ശേഷം ഇയാള്‍ പതിയെ നടന്നു വരികയായിരുന്നു. പെട്ടെന്നാണ് മുന്നിലൂടെ കടുവ റോഡ് മറികടന്ന് പോയത്.
ഭയന്നു പോയതിനെ തുടര്‍ന്ന് പ്രവീണിന് ഹൃദയാഘാതം സംഭവിക്കുകയായിരുന്നു. പിന്നാലെ പ്രഭാതസവാരിക്കായി എത്തിയ ആളുകളാണ് പ്രവീണ്‍ റോഡില്‍ വീണു കിടക്കുന്നതായി കണ്ടത്. ഇവരാണ് ആംബുലന്‍സ് വിളിക്കുകയും പോലീസിനെ വിവരമറിയിക്കുകയും ചെയ്തത്. എന്നാല്‍ ഇവരെത്തുന്നതിന് മുമ്പ് തന്നെ പ്രവീണിന് മരണം സംഭവിച്ചിരുന്നു.
