വര്ക്കല : ശിവഗിരി പ്രദേശത്ത് യുവാവ് കിണറ്റില് വീണ് മൂന്ന് ദിവസത്തിനുശേഷം രക്ഷപ്പെടുത്തി. എം.ജി കോളനി ശ്രീനി ഭവനില് മനോജ് (42)ആണ് കിണറ്റില് വീണത്. ശിവഗിരി സ്വദേശിയായ മണിലാല് എന്ന ആളിന്റെ കിണര് വൃത്തിയാക്കുന്നതിനു ഇറങ്ങവേ കാല്തെറ്റിയാണ് 60 അടി താഴ്ചയുള്ള കിണറ്റിലേക്ക് വീണത്. മനോജ് ഒറ്റയ്ക്കാണ് സാധാരണ പണിക്ക് പോകുന്നത്.
രണ്ടു ദിവസത്തിലേറെ കിണറിനകത്ത് കിടന്ന് നിലവിളിച്ചെങ്കിലും ആരും കേട്ടില്ല. വൈകുന്നേരം ആയിട്ടും മനോജ് വീട്ടില് തിരിച്ചെത്താത്തതിനെ തുടര്ന്ന് ബന്ധുക്കള് വര്ക്കല പോലീസില് പരാതി നല്കിയിരുന്നു. ശിവഗിരി പ്രദേശത്ത് പണിക്ക് പോയതായി വിവരം ലഭിച്ചതിനെ തുടര്ന്ന് സംഭവം നടന്ന ഭാഗത്ത് തെരച്ചില് നടത്തുന്നതിനിടെയാണ് ചൊവ്വാഴ്ച രാവിലെ കിണറ്റില് നിന്നു നിലവിളി കേട്ടത്. ഫയര്ഫോഴ്സ് എത്തി യുവാവിനെ രക്ഷപ്പെടുത്തുകയായിരുന്നു. വര്ക്കല താലൂക്ക് ആശുപത്രിയില് പ്രവേശിപ്പിച്ച യുവാവ് നിരീക്ഷണത്തിലാണ്.
