ഭോപ്പാല് : പരീക്ഷയില് തോറ്റാല് വഴക്കുപറയുമെന്ന് ഭയന്ന് പത്താം ക്ളാസുകാരന് പിതാവിനെ കോടാലി കൊണ്ട് വെട്ടിക്കൊന്നു. മദ്ധ്യപ്രദേശിലെ ഗുണ ജില്ലയിലാണ് സംഭവം. ഏപ്രില് രണ്ടിന് രാത്രി പിതാവ് ഉറങ്ങിക്കിടക്കുമ്പോഴാണ് മകന് കോടാലി ഉപയോഗിച്ച് കൊലപ്പെടുത്തിയത്. എന്നാല് വീട്ടുകാരുമായി അടുപ്പത്തിലല്ലാതിരുന്ന അയല്വാസിയും മറ്റൊരാളും സംഭവത്തിന് പിന്നാലെ ഓടിപ്പോകുന്നത് കണ്ടതായാണ് പതിനഞ്ചുകാരന് പോലീസിന് പരാതി നല്കിയത്. ഇതേത്തുടര്ന്ന് പോലീസ് അയല്വാസിയെ അറസ്റ്റ് ചെയ്യുകയും ചോദ്യം ചെയ്യുകയും ചെയ്തു.
എന്നാല് ഫോറന്സിക് പരിശോധനയില് പതിനഞ്ചുകാരന് പറഞ്ഞത് തെറ്റാണെന്ന് കണ്ടെത്തുകയായിരുന്നു. പിന്നാലെ ചോദ്യം ചെയ്യുന്നതിനിടെ കുട്ടി കുറ്റസമ്മതം നടത്തി. പത്താം ക്ളാസ് പരീക്ഷയില് തോറ്റാല് പിതാവ് വഴക്ക് പറയുമെന്നും വീട്ടില് നിന്നും പുറത്താക്കുമെന്നും കുട്ടി ഭയന്നിരുന്നു. ഇതിന് പിന്നാലെയാണ് പിതാവിനെ കൊലപ്പെടുത്താന് തീരുമാനിക്കുന്നത്. കുട്ടിയെ കസ്റ്റഡിയില് എടുക്കുകയും കോടതി ജുവനൈല് ഹോമിലേക്ക് അയക്കുകയും ചെയ്തു.
