തൃശ്ശൂര്: തൃശ്ശൂരില് ഭര്ത്താവിന്റെ വെട്ടേറ്റ് ഗുരുതരാവസ്ഥയില് ചികിത്സയിലായിരുന്ന യുവതി മരിച്ചു. തളിക്കുളം നമ്പിക്കടവ് സ്വദേശിനി ഹഷിതയാണ് ഭര്ത്താവിന്റെ വെട്ടേറ്റ് ചികിത്സയില് തുടരുന്നതിനിടെ മരിച്ചത്. 25 വയസ്സായിരുന്നു. ഇന്നലെ വൈകിട്ടാണ് സ്വന്തം വീട്ടില് വെച്ച് ഹഷിതയേയും മാതാപിതാക്കളേയും ഭര്ത്താവ് കാട്ടൂര് സ്വദേശി മംഗലത്ത് വീട്ടില് മുഹമ്മദ് ആഷിഫ് വെട്ടിപ്പരിക്കേല്പ്പിച്ചത്. പ്രസവം കഴിഞ്ഞ് വിശ്രമത്തിലായിരുന്ന ഹഷിതയേയും കുഞ്ഞിനേയും കാണാനായിട്ടാണ് ആഷിഫ് വീട്ടിലെത്തിയത്.
പിന്നീട് ഹഷിതയുമായി വാക്ക് തര്ക്കം ഉണ്ടാവുകയും ഒടുവില് ഹഷിതയേയും പിതാവ് നൂറുദ്ദീന് (55), മാതാവ് നസീമ (50) എന്നിവരേയും ഇയാള് വെട്ടുകയായിരുന്നു. ആഷിഫിന്റെ ആക്രമണത്തില് സാരമായി പരിക്കേറ്റ ഹഷിതയും നൂറുദ്ദീനും തൃശ്ശൂരിലെ സ്വകാര്യ ആശുപത്രിയില് ചികിത്സയിലായിരുന്നു. ഹഷിതയുടെ ദേഹത്താകെ വെട്ടേറ്റ പാടുകളുണ്ടായിരുന്നു. നൂറുദ്ദീന്റെ തലയ്ക്കാണ് വെട്ടേറ്റത്. ആക്രണത്തിന് ശേഷം ഒളിവില് പോയ ആഷിഫിനായി പോലീസ് തെരച്ചില് തുടരുകയാണ്.
