കോഴിക്കോട്: യുവതി കടലില് ചാടി മരിച്ച സംഭവത്തില് ദുരൂഹതയുണ്ടെന്നുകാട്ടി ബന്ധുക്കള് പോലീസില് പരാതി നല്കി. പയ്യാനക്കല് ചക്കുംകടവ് വടക്കയില് സജിത (25) കോതി പാലത്തില് നിന്ന് കടലില് ചാടി മരിച്ചതിലാണ് ദുരൂഹത ആരോപിച്ച് പിതാവ് ശശിധരന് പന്നിയങ്കര പോലീസില് പരാതി നല്കിയത്.
ജനുവരി 11ന് രാവിലെ 11 ഓടെയാണ് യുവതി കടലില് വീണത്. മത്സ്യത്തൊഴിലാളികള് വിവരം അറിഞ്ഞതോടെ രക്ഷപെടുത്തി ആദ്യം ബീച്ച് ആശുപത്രിയില് പ്രവേശിപ്പിക്കുകയായിരുന്നു. പിന്നീട് ഇവരെ സ്വകാര്യ ആശുപത്രിയിലേക്ക് മാറ്റിയെങ്കിലും ആന്തരികാവയവങ്ങള് പൂര്ണമായും പ്രവര്ത്തനരഹിതമായി 12ന് വൈകിട്ട് മൂന്നരയോടെ മരിച്ചു. യുവതിയെ കടലില് തള്ളിയിട്ടെന്ന സംശയമാണ് പിതാവ് പരാതിയില് ഉന്നയിക്കുന്നത്.
സജിത ജോലി ചെയ്യുന്ന സ്ഥാപനത്തിലെ കുറ്റിക്കാട്ടൂര് സ്വദേശി അനൂപ്, ശുചിമുറിയില് മൊബൈല് കാമറ സ്ഥാപിച്ച് ഇവരുടെ സ്വകാര്യ രംഗങ്ങള് പകര്ത്തുകയും സംഭവത്തില് അനൂപ് അറസ്റ്റിലാവുകയും ചെയ്തിരുന്നു. ഈ സംഭവത്തോടെ ഭര്ത്താവ് ഇവരെ ഉപേക്ഷിച്ചു. പിന്നീട് കേസില് ജാമ്യത്തിലിറങ്ങിയ അനൂപ്, സജിതയെ വിവാഹം കഴിക്കാമെന്നുപറഞ്ഞ് വിശ്വസിപ്പിച്ചു. ഇതിന് ആദ്യം കേസ് പിന്വലിക്കണമെന്ന ആവശ്യം ഉന്നയിച്ചതോടെ വിവാഹശേഷം കേസ് പിന്വലിക്കാമെന്ന് സജിത നിലപാടെടുത്തു.
ഇതോടെ ഇയാള് വീണ്ടും ഭീഷണിപ്പെടുത്തിയതായും പരാതിയില് പറയുന്നു. കടലില് ചാടിയതിന് തൊട്ടുമുമ്പ് ഇരുവരെയും മത്സ്യത്തൊഴിലാളികള് കണ്ടിരുന്നതായി പറയുന്നുണ്ട്. മകള് ആത്മഹത്യ ചെയ്യില്ലെന്നും അനൂപ് കടലില് തള്ളിയിട്ടെന്ന സംശയവും പരാതിയില് ചൂണ്ടിക്കാട്ടുന്നു. മരിക്കുന്നതിനുമുമ്പ് സജിതയിട്ട വാട്സ് ആപ് സ്റ്റാറ്റസ്, ചാറ്റുകള്, ഫോണ്കാള് വിവരങ്ങള് ഉള്പ്പെടെ കുടുംബം തെളിവായി പോലീസിന് നല്കിയിട്ടുണ്ട്.