തിരുവനന്തപുരം : തിരുവനന്തപുരത്ത് മദ്യപാനത്തിനിടെ സുഹൃത്തുക്കളുടെ മർദ്ദനമേറ്റ് യുവാവ് മരിച്ചു. ശ്രീകാര്യം കട്ടേല സ്വദേശി സജു (38) ആണ് മരിച്ചത്. സംഭവത്തിൽ സുഹൃത്തുക്കളായ വിനോദ്, അനീഷ് എന്നിവർ ഒളിവിലാണ്. മൊബൈലിനെ ചൊല്ലിയുള്ള തർക്കമാണ് മർദ്ദനത്തിൽ കലാശിച്ചതെന്ന് പോലീസ് പറയുന്നു. വെഞ്ഞാറംമൂടുള്ള കോഴിക്കടയിലെ ജീവനക്കാരനാണ് മരിച്ച സജു. ഇന്നലെ രാത്രി ഇയാളെ സുഹൃത്തുക്കള് വീട്ടില് നിന്ന് വിളിച്ചിറക്കി കൊണ്ടുപോകുകയായിരുന്നു. മൂന്നുപേരും സ്ഥിരമായി മദ്യപിക്കുന്നവരാണെന്നും പോലീസ് പറഞ്ഞു.
ഇന്നലെ രാത്രി ഒമ്പതുമണിയോടെയാണ് കൊലപാതകം നടന്നത്. ഇന്ന് പുലര്ച്ചെയാണ് സജുവിനെ മരിച്ച നിലയില് കണ്ടെത്തുന്നത്. കല്ലുകൊണ്ടും മറ്റുമാണ് സുഹൃത്തുക്കൾ സജുവിനെ മർദിച്ചത്. ദേഹത്താകെ മർദനമേറ്റ സജു ഇവിടെതന്നെ കിടന്ന് മരിക്കുകയായിരുന്നു. മൃതദേഹം കണ്ട നാട്ടുകാരാണ് പോലീസിനെ വിവരമറിയിച്ചത്. ഒളിവില് പോയ പ്രതികള്ക്കായി അന്വേഷണം ആരംഭിച്ചതായി ശ്രീകാര്യം പോലീസ് പറഞ്ഞു.
