മംഗളൂരു : ഭര്‍ത്താവ് വാഹനാപകടത്തില്‍ മരിച്ചതില്‍ മനംനൊന്ത് ആറ് മാസം പ്രായമായ കുഞ്ഞിനെ കൊന്ന് യുവതി ആത്മഹത്യ ചെയ്തു. ഗംഗാധര്‍ കമ്മാരയെന്ന മംഗളൂരു ഫയര്‍ഫോഴ്സ് ഡ്രൈവറാണ് കഴിഞ്ഞ ദിവസം വാഹനാപകടത്തില്‍ മരിച്ചതെന്ന് പോലീസ് കമ്മീഷണര്‍ എന്‍.ശശികുമാര്‍ അറിയിച്ചു. എന്‍.എച്ച്‌-66ല്‍ കുന്തികാനയില്‍ ശനിയാഴ്ച രാത്രി 8.50ഓടെയാണ് സംഭവമുണ്ടായത്. റോഡ് മുറിച്ചുകടക്കുന്നതിനിടെ ഇയാളെ എസ്.യു.വി വന്നിടിക്കുകയായിരുന്നു. സംഭവത്തില്‍ കേസ് രജിസ്റ്റര്‍ ചെയ്ത് ഉടന്‍ തന്നെ വിവരം വീട്ടുകാരേയും അറിയിച്ചു.
ഗംഗാധറിന്റെ ഭാര്യ റായ്ച്ചൂരില്‍ സഹോദരനൊപ്പമാണ് താമസിച്ചിരുന്നുത്. ഇവരേയും അപകടവിവരം അറിയിച്ചിരുന്നു. ഇതറിഞ്ഞയുടന്‍ ആറ് മാസം പ്രായമായ കുഞ്ഞിനെ സാരി ഉപയോഗിച്ച്‌ കൊലപ്പെടുത്തിയ ശേഷം 32കാരി ആത്മഹത്യ ചെയ്യുകയായിരുന്നു. രാത്രി 10 മണിയോടെയാണ് സംഭവം നടന്നതെന്ന് പോലീസ് പറഞ്ഞു. കേസില്‍ വിശദമായ അന്വേഷണം നടന്നു വരികയാണെന്നും പോലീസ് വ്യക്തമാക്കി.
