കല്ലമ്പലം: മാതാവിനെ കൊലപ്പെടുത്താന്‍ ശ്രമിച്ച കേസില്‍ പ്രതിയെ കല്ലമ്പലം പോലീസ് പിടികൂടി. ഒറ്റൂര്‍ തോക്കാല സജി നിവാസില്‍ ഷാജി (38) ആണ് പിടിയിലായത്. ഇതുസംബന്ധിച്ച്‌ പൊലീസ് പറയുന്നത്. പ്രതി ഷാജി വീട്ടില്‍ സ്ഥിരമായി മദ്യം വാങ്ങിവരുകയും മദ്യപിച്ച ശേഷം വീട്ടുകാര്‍ക്കും നാട്ടുകാര്‍ക്കും സ്ഥിരം ശല്യമുണ്ടാക്കിവരുകയായിരുന്നു.
ഇദ്ദേഹത്തിന്‍റെ മാതാവ് പുഷ്പവല്ലി (69) ഇതിനെ വിലക്കിയതിലുള്ള വിരോധമാണ് കത്തിക്കുത്തില്‍ കലാശിച്ചത്. പുഷ്പവല്ലി കിണറ്റില്‍ നിന്ന് വെള്ളം കോരവെ കത്തിയുമായി പിറകിലൂടെ എത്തിയ പ്രതി പുഷ്പവല്ലിയുടെ മുതുകില്‍ കത്തി കുത്തിയിറക്കുകയായിരുന്നു. സ്ഥലത്ത് ഓടിക്കൂടിയ നാട്ടുകാര്‍ പുഷ്പവല്ലിയെ ആശുപത്രിയിലാക്കാന്‍ ശ്രമിച്ചെങ്കിലും പ്രതി അനുവദിച്ചില്ല.
വിവരം അറിഞ്ഞ് സ്ഥലത്തെത്തിയ പോലീസ് സംഘമാണ് പുഷ്പവല്ലിയെ ആശുപത്രിയിലാക്കിയത്. പൊലീസ് എത്തിയ സമയം പ്രതി വീടിനുള്ളില്‍ കയറി വാതിലടക്കുകയും ഓടിളക്കി വീട്ടില്‍ നിന്നിറങ്ങി മരത്തിലൂടെ ഊര്‍ന്ന് രക്ഷപ്പെടുകയുമായിരുന്നു.
ആറ്റിങ്ങല്‍ ഡിവൈ.എസ്.പി സുരേഷിനു കിട്ടിയ രഹസ്യവിവരത്തിെന്‍റ അടിസ്ഥാനത്തില്‍ പ്രതിയെ കല്ലമ്പലം പൊലീസ് സ്റ്റേഷന്‍ എസ്.എച്ച്‌.ഒ ഐ. ഫറോസിെന്‍റ നേതൃത്വത്തില്‍ എസ്.ഐ വി. ഗംഗാപ്രസാദ്, ആര്‍.എസ്. അനില്‍, ജി.എസ്.ഐ സനില്‍ കുമാര്‍, ജി.എ.എസ്.ഐ സുനില്‍, ഷാന്‍, ഡബ്ല്യൂ.സി.പി.ഒ സുരജ എന്നിവര്‍ ചേര്‍ന്ന് അറസ്റ്റ് ചെയ്തു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
പരിക്കുപറ്റിയ പുഷ്പവല്ലിയെ ഏറ്റെടുക്കാന്‍ ആളില്ലാതിരുന്നതിനാല്‍ വര്‍ക്കല പുനര്‍ജനി ചാരിറ്റബിള്‍ സൊസൈറ്റി എന്ന സംഘടന ഏറ്റെടുത്ത് ചികിത്സ നടത്തി വരികയാണ്
