കരുനാഗപ്പള്ളി : നിരവധി കേസുകളില്‍ പ്രതിയായ യുവാവ് കാപ്പാ നിയമപ്രകാരം അറസ്റ്റില്‍. തൊടിയൂര്‍ പുലിയൂര്‍വഞ്ചി വടക്ക് റഹിം മന്‍സിലില്‍ മുഹമ്മദ് ഫൈസല്‍ഖാന്‍ (ഫൈസല്‍ ഖാന്‍ -26) ആണ് അറസ്റ്റിലായത്. കരുനാഗപ്പള്ളി പോലീസാണ് അറസ്റ്റു ചെയ്തത്. കരുനാഗപ്പളളി പോലീസ് സ്റ്റേഷനില്‍ നാലു വധശ്രമ കേസുകളിലും രണ്ടു കവര്‍ച്ചാ കേസുകളിലും ഉള്‍പ്പെടെ ഏഴു കേസുകളില്‍ ഇയാള്‍ പ്രതിയാണെന്ന് പോലീസ് അറിയിച്ചു. തഴവ കൊറ്റംപ്പളളിയ്ക്ക് സമീപം അജയഘോഷ് എന്നയാളെ ഇരുമ്പ് പൈപ്പുകൊണ്ട് തലയ്ക്കടിച്ച്‌ കൊലപ്പെടുത്താന്‍ ശ്രമിച്ച കേസിലും മണപ്പളളി ജംഗ്ഷനില്‍ കാറില്‍ സഞ്ചരിച്ച സന്ദീപ് എന്നയാളെ കാര്‍ തടഞ്ഞു നിര്‍ത്തി ആക്രമിച്ച്‌ മൊബൈല്‍ ഫോണ്‍ കവര്‍ച്ച ചെയ്ത കേസിലുമടക്കം നിരവധി കേസുകളില്‍ ഇയാള്‍ പ്രതിയാണ്.
ഇടക്കുളങ്ങരയില്‍ യുവാവിനെ കൊലപ്പെടുത്താന്‍ ശ്രമിച്ച കേസിനെ തുടര്‍ന്നാണ് ഇയാള്‍ക്കെതിരെ കാപ്പ ചുമത്തുന്നതിന് ജില്ലാ പോലീസ് മേധാവി ടി.നാരായണന്‍ ജില്ലാ കളക്ടര്‍ അഫ്‌സാന പര്‍വീണിന് റിപ്പോര്‍ട്ട് നല്‍കിയത്. തുടര്‍ന്ന്, പൊതുജനസുരക്ഷയ്ക്കുവേണ്ടി ജില്ലാ കളക്ടര്‍ കരുതല്‍ തടങ്കല്‍ ഉത്തരവ് പുറപ്പെടുവിക്കുകയായിരുന്നു. കാപ്പാ ജില്ലാ നോഡല്‍ ഓഫീസര്‍ കൂടിയായ സ്‌പെഷ്യല്‍ ബ്രാഞ്ച് അസിസ്റ്റന്റ് കമ്മീഷണര്‍ കെ.അശോക കുമാര്‍, കരുനാഗപ്പളളി എസിപി വി.എസ് പ്രദീപ് കുമാര്‍ എന്നിവരുടെ നിര്‍ദ്ദേശപ്രകാരം കരുനാഗപ്പളളി ഇന്‍സ്‌പെക്ടര്‍ ജി.ഗോപകുമാറിന്റെ നേതൃത്വത്തിലാണ് പ്രതിയെ അറസ്റ്റു ചെയ്തത്. പ്രോബേഷന്‍ എസ്‌ഐ ജിമ്മി ജോസ്, എസ്.ഐ സന്തോഷ്, എഎസ്‌ഐ മാരായ ഷാജിമോന്‍, നന്ദകുമാര്‍ എന്നിവരും അന്വേഷണ സംഘത്തില്‍ ഉണ്ടായിരുന്നു.
