ന്യൂയോര്ക്ക് : ന്യൂയോര്ക്കില് ബഫലോ നഗരത്തിലെ സൂപ്പര്മാര്ക്കറ്റിലുണ്ടായ വെടിവെപ്പില് പത്ത് പേര് കൊല്ലപ്പെട്ടു. നിരവധി പേര്ക്ക് പരുക്കേറ്റു. ടോപ്സ് ഫ്രണ്ട്ലി സൂപ്പര്മാര്ക്കറ്റിലാണ് വെടിവെപ്പുണ്ടായത്. പട്ടാളക്കാരന്റേത് എന്ന് തോന്നിപ്പിക്കുന്ന വേഷം ധരിച്ചെത്തിയ പേടെന് ജെന്ഡ്രന് (18) എന്നയാളാണ് വെടിയുതിര്ത്തതെന്ന് പോലീസ് പറഞ്ഞു. അക്രമിയെ പോലീസ് കസ്റ്റഡിയിലെടുത്തിട്ടുണ്ട്. അക്രമി സൂപ്പര്മാര്ക്കറ്റിലേക്ക് ആദ്യം കയറുകയും പിന്നീട് പുറത്തിറങ്ങി വാഹനങ്ങള് പാര്ക്ക് ചെയ്യുന്നതിന് സമീപമെത്തി ആളുകള്ക്ക് നേരെ വെടിയുതിര്ക്കുകയുമായിരുന്നു. ആക്രമണത്തിന്റെ ദൃശ്യങ്ങള് ഹെല്മെറ്റില് ഘടിപ്പിച്ച ക്യാമറയിലൂടെ അക്രമി തന്നെ പുറത്ത് വിടുകയും ചെയ്തിട്ടുണ്ട്.
വെടിവെപ്പിന്റെ ലൈവ് സ്ട്രീമിങ്ങിനായി ക്യാമറ ഘടിപ്പിച്ച ഹെല്മറ്റ് ധരിച്ചാണ് ഇയാള് എത്തിയതെന്ന് സിറ്റി പോലീസ് കമ്മീഷണര് ജോസഫ് ഗ്രമാഗ്ലിയ മാധ്യമങ്ങളോടു പറഞ്ഞു. സൂപ്പര്മാര്ക്കറ്റിന് പുറത്തുള്ള നാലു പേരെയാണ് അക്രമി ആദ്യം വെടിവച്ചത്. സ്ഥാപനത്തിലെ സുരക്ഷാ ജീവനക്കാരന് വെടിവച്ച് ഇയാളെ പ്രതിരോധിക്കാന് നോക്കിയെങ്കിലും ബുള്ളറ്റ് പ്രൂഫ് ജാക്കറ്റ് ധരിച്ചിരുന്നതിനാല് അക്രമിക്ക് പരുക്കേറ്റില്ല. ഇതിന് പിന്നാലെ സുരക്ഷാ ജീവനക്കാരനേയും അക്രമി വെടിവച്ച് കൊന്നു. തുടര്ന്ന് ഇയാള് കടയ്ക്കുള്ളിലേക്ക് കയറി കൂടുതല് ആളുകള്ക്ക് നേരെ വെടിയുതിര്ക്കുകയായിരുന്നു. കറുത്ത വര്ഗക്കാര് കൂടുതലായി താമസിക്കുന്ന പ്രദേശത്തായിരുന്നു ആക്രമണം. വംശീയ പ്രേരിതമാണോ ആക്രമണമെന്ന് അന്വേഷിക്കുമെന്ന് ഉന്നത പോലീസ് ഉദ്യോഗസ്ഥര് അറിയിച്ചു.
