കൊല്ലം: യൂത്ത് കോൺഗ്രസുകാരെ മർദിച്ച മുൻ ഡിവൈഎഫ്ഐ നേതാവിന് ഉൾപ്പെടെ പാർട്ടിയിൽ അംഗത്വം നൽകി ആർഎസ്പി. സംഭവത്തിൽ ആർഎസ്പിക്കെതിരെ വിമർശനവുമായി യൂത്ത് കോൺഗ്രസ് സംസ്ഥാന വൈസ് പ്രസിഡന്റ് വിഷ്ണു സുനിൽ രംഗത്ത് എത്തി.സിപിഎം ക്രിമിനലുകൾക്ക് ആര്എസ്പി രാഷ്ട്രീയ അഭയം നൽകുന്നു. ആർഎസ്പി, പിണറായിസം പ്രത്യയശാസ്ത്രമാക്കുന്നത് അപഹാസ്യമാണ്. ആർഎസ്പി അനുഭവിക്കുന്ന അധികാരം യൂത്ത് കോൺഗ്രസ് പ്രവർത്തകർ ചോരയൊഴുക്കി സമരം ചെയ്ത് കിട്ടിയതാണെന്ന് ഓർക്കണമെന്നും വിഷ്ണു സുനിൽ പറഞ്ഞു.
ഡിവൈഎഫ്ഐ കൊല്ലം ബ്ലോക്ക് ജോയിൻ സെക്രട്ടറി സനോഫർ ഉൾപ്പടെയുള്ളവർക്ക് ആർഎസ്പിയിൽ അംഗത്വം നൽകിയതിലാണ് രൂക്ഷ വിമർശനം.മോഹഭംഗമാണ് ഇവരെ ആർ.എസ്.പിയിലേക്ക് എത്തിച്ചതെന്ന് തിരിച്ചറിയണം. നാട്ടിൽ ഇവർക്കുള്ള സ്വീകാര്യതയെക്കുറിച്ച് കൂടി അന്വേഷിക്കണമായിരുന്നു. സാമൂഹ്യവിരുദ്ധ പ്രവർത്തനങ്ങൾക്കും ഗുണ്ടായിസത്തിനുമുള്ള സംരക്ഷണവും ഇവർ ആഗ്രഹിക്കുന്നു. ആർ.എസ്.പിയുടെ പോളിറ്റ് ബ്യൂറോ അംഗമാക്കിയാലും ഇത്തരം ക്രിമിനലുകൾക്കെതിരായ പോരാട്ടം തുടരുമെന്നും ഫേസ്ബുക്കിലെഴുതിയ കുറിപ്പില് വിഷ്ണു സുനിൽ എഴുതി.
