തിരുവനന്തപുരം: വിവാദ സ്വര്ണക്കടത്ത് കേസുമായി ബന്ധപ്പെട്ട് യുഎഇ മുന് കോണ്സുലേറ്റ് ജനറലിന്റെ ബാഗില് നിന്ന് 11 മൊബൈല് ഫോണുകളും രണ്ട് പെന്ഡ്രൈവും കസ്റ്റംസ് പിടികൂടി. വിദേശത്തേയ്ക്ക് അയക്കാന് എത്തിച്ചവയാണ് ബാഗുകളെന്നാണ് വിവരം. തിരുവനന്തപുരം എയര് കാര്ഗോയിലെ പരിശോധനയിലാണ് മൊബൈല് ഫോണുകളും പെന്ഡ്രൈവും പിടിച്ചെടുത്തത്. എന്നാല് കേന്ദ്രസര്ക്കാരിന്റെ അനുമതിയോടെയാണ് മുന് യുഎഇ കോണ്സുല് ജനറല് ജമാല് അല്സാബിയുടെ ബാഗുകള് കസ്റ്റംസ് തുറന്ന് പരിശോധിച്ചത്.
എന്നാല് കോണ്സുല് ജനറല് താമസിച്ചിരുന്ന തിരുവനന്തപുരത്തെ ഫ്ലാറ്റിലുള്ള ബാഗുകളും വീട്ടുസാധനങ്ങളും കോണ്സുലേറ്റ് ഉദ്യോഗസ്ഥരുടെ സാന്നിധ്യത്തില് പരിശോധിച്ചിരുന്നു. ഇവ യുഎഇയില് എത്തിക്കാനായാണ് വിമാനത്താവളത്തില് എത്തിച്ചത്. എന്നാല് പരിശോധിക്കാതെ വസ്തുക്കളൊന്നും കൊണ്ടുപോകാനാകില്ലെന്ന് കസ്റ്റംസ് നിലപാടെടുക്കുകയായിരുന്നു. ഇക്കാര്യം കേന്ദ്രസര്ക്കാരിനെ കസ്റ്റംസ് അറിയിച്ചിരുന്നു. അതിന് ശേഷമാണ് കേന്ദ്രസര്ക്കാരിന്റെ അനുമതിയോടെ ബാഗേജ് പരിശോധിച്ചത്. പരിശോധന കസ്റ്റംസ് വീഡിയോയില് പകര്ത്തുകയും ചെയ്തു.
