ചെന്നൈ: അച്ഛന്റെ സഹോദരിയുടെ നേതൃത്വത്തില് പതിനാറുകാരിയെ ഇരുന്നൂറിലേറെ പേര്ക്ക് കാഴ്ചവെച്ച് ക്രൂരപീഡനത്തിനിരയാക്കിയ പെണ്വാണിഭ സംഘം പോലീസ് പിടിയില്. സ്ത്രീകളുടെ നേതൃത്വത്തിലുള്ള ആറംഗ പെണ്വാണിഭ സംഘത്തെ മാസങ്ങള് നീണ്ട അന്വേഷണത്തിന് ഒടുവിലാണ് പോലീസ് കുടുക്കിയത്. സ്വന്തം അച്ഛന്റെ സഹോദരിയുടെ നേതൃത്തിലായിരുന്നു പീഡനം. മധുരയില് നിന്നുള്ള 16 കാരിയാണ് ക്രൂര പീഡനത്തിനിരയായത്.
സംഭവത്തെക്കുറിച്ച് മധുര ഡെപ്യൂട്ടി കമ്മീഷണര് ശിവപ്രസാദ് പറയുന്നത് ഇങ്ങിനെ. നാലുവര്ഷം മുമ്പ് പെണ്കുട്ടിയുടെ അച്ഛന് മരിച്ചു. അമ്മയ്ക്കു മാനസിക ദൗര്ബല്യംകൂടി ആയതോടെ പെണ്കുട്ടിയുടെ സംരക്ഷണം അമ്മായി അന്നലക്ഷ്മി ഏറ്റെടുത്തു. പിന്നീട് അന്നലക്ഷ്മി പെണ്കുട്ടിയെ വിവിധയാളുകള്ക്കു കാഴ്ച വെച്ചു തുടങ്ങി. കൂടുതല് പണം ലക്ഷ്യം വെച്ച് പിന്നീട് പ്രദേശത്തെ ലൈംഗികതൊഴിലാളിയായ സുമതിയെന്ന സ്ത്രീയുടെ അടുത്തേക്ക് എത്തിച്ചു.
പണവും മൊബൈല് ഫോണുകളും നല്കി പെണ്കുട്ടിയെ പാട്ടിലാക്കിയ സംഘം പിന്നീട് ലോറിത്താവളങ്ങളിലടക്കം ആംബുലന്സില് എത്തിച്ച് ഇടപാടുകള് നടത്തി . തുടര്ന്ന് സുമതി സുഹൃത്തുക്കളായ അനാര്ക്കലി, തങ്കം, ചന്ദ്രകല എന്നിവര്ക്കു കൈമാറി. ഇവരും ഇടപാടുകാര്ക്കായി പെണ്കുട്ടിയെ വിവിധ സ്ഥലങ്ങളില് എത്തിച്ചു. സംഘത്തില്പെട്ട ഡ്രൈവര് ചിന്നതമ്പി എന്നയാള്കൂടി പിടിയിലാകാനുണ്ടെന്ന് പോലീസ് അറിയിച്ചു.
പെണ്കുട്ടിയെ വൈദ്യ പരിശോധനയ്ക്കു ശേഷം സുരക്ഷിത കേന്ദ്രത്തിലേക്കു മാറ്റി. മനുഷ്യക്കടത്ത് അന്വേഷിക്കുന്ന സംഘത്തിന് ലഭിച്ച വിവരത്തിന്റെ അടിസ്ഥാനത്തില് രണ്ടരമാസത്തിലേറെ സമയമെടുത്തു നടത്തിയ നീക്കങ്ങള്ക്കൊടുവിലാണ് അറസ്റ്റ്.
