പുനലൂര് : ജോലി കഴിഞ്ഞു മടങ്ങിയ വീട്ടമ്മയെ വഴിയില് തടഞ്ഞുനിര്ത്തി അക്രമിക്കാന് ശ്രമിച്ച കേസില് രണ്ടുപേരെ കുന്നിക്കോട് പോലീസ് അറസ്റ്റ് ചെയ്തു. മേലില സ്കൂള് ജങ്ഷനില് മനോജ് ഭവനില് മനോജ്, കിണറ്റിന്കര വയലിറക്കത്ത് വീട്ടില് ഗണേഷ് എന്നിവരാണ് പിടിയിലായത്. കഴിഞ്ഞദിവസം രാത്രി എട്ടോടെയായിരുന്നു സംഭവം. പുനലൂരിലെ സ്വകാര്യ ധനകാര്യ സ്ഥാപനത്തില് ജീവനക്കാരിയായ വീട്ടമ്മ ജോലി കഴിഞ്ഞ് മടങ്ങിവരവെ വീടിന് സമീപം വെച്ച് ഓട്ടോയിലെത്തിയ രണ്ടുപേര് കടന്നുപിടിക്കുകയും അക്രമിക്കാന് ശ്രമിക്കുകയുമായിരുന്നു. ബഹളം വെച്ചപ്പോഴേക്കും ഇരുവരും ഓടി രക്ഷപ്പെട്ടു. ഓട്ടോയുടെ നമ്പറും പേരും നല്കിയതിന്റെ അടിസ്ഥാനത്തിലാണ് കുന്നിക്കോട് പോലീസ് അന്വേഷണം നടത്തി ഇരുവരെയും പിടികൂടിയത്. ഇവരെ കോടതിയില് ഹാജരാക്കി റിമാന്ഡ് ചെയ്തു.
