ബുലന്ദ്ശഹര് : യു.പിയില് ഡോക്ടറുടെ എട്ടുവയസുകാരന് മകനെ തട്ടിക്കൊണ്ടുപോയി കൊലപ്പെടുത്തി. ബുലന്ദ്ശഹറില് നിന്നും രണ്ട് ദിവസം മുന്പ് കാണാതായ എട്ടുവയസുകാരന്റെ മൃതദേഹം ഞായറാഴ്ച്ചയാണ് പോലിസ് കണ്ടെത്തിയത്. സംഭവത്തില് കുട്ടിയുടെ പിതാവായ ഡോക്ടറുടെ മുന്ജോലിക്കാരായ നിജം, ഷാഹിദ് എന്നിവരെ പോലിസ് അറസ്റ്റ് ചെയ്തു. ചതാരി പോലിസ് സ്റ്റേഷന് പരിസരത്തുനിന്നാണ് കുട്ടിയുടെ മൃതദേഹം കണ്ടെത്തിയത്. വെള്ളിയാഴ്ച വൈകുന്നേരത്തോടെ കുട്ടിയെ കാണാതായതിന് പിന്നാലെ പിതാവ് പോലീസ് സ്റ്റേഷനില് പരാതിയുമായെത്തിയിരുന്നു. പിന്നാലെ പോലീസ് അന്വേഷണം ആരംഭിച്ചിരുന്നു.
പ്രാഥമിക അന്വേഷണത്തില് കണ്ടെത്തിയ വിവരങ്ങളുടെ അടിസ്ഥാനത്തില് ഡോക്ടറുടെ പഴയ ജോലിക്കാരെ പോലീസ് ചോദ്യം ചെയ്യുകയായിരുന്നു. ഡോക്ടറുടെ കൂടെ കമ്പൗണ്ടര്മാരായി ജോലി ചെയ്തിരുന്നവരാണ് ഇരുവരും. രണ്ട് വര്ഷം മുമ്പ്, ജോലിയില് പിഴവ് വരുത്തിയതിന് പിരിച്ചുവിട്ടതിനാല് ഡോക്ടറോടുള്ള വൈരാഗ്യമാണ് കുട്ടിയെ തട്ടിക്കൊണ്ടുപോയി കൊലപ്പെടുത്തിയതിന് പിന്നിലെന്ന് പ്രതികള് പോലിസിനോട് സമ്മതിച്ചു.
