ന്യൂഡൽഹി : കോവിഡിനെതിരെ ഡി.ആർ.ഡി.ഒ. വികസിപ്പിച്ച 2-ഡിജി മരുന്നിന്റെ വാണിജ്യ വിപണനം തുടങ്ങി. കോവിഡ് മുക്തി വേഗത്തിലാക്കാൻ ഈ മരുന്നിന് കഴിയുമെന്ന് കണ്ടെത്തിയിരുന്നു. ഇന്ത്യ തദ്ദേശീമായി വികസിപ്പിച്ച മരുന്ന് കോവിഡ് ചികിത്സയിൽ നാഴികക്കല്ലാവുമെന്നാണ് പ്രതീക്ഷിക്കുന്നത്.
2 ഡിഓക്സി-ഡി ഗ്ലൂക്കോസ് എന്നതിന്റെ ചുരുക്കപ്പേരാണ് 2 ഡിജി. കേന്ദ്രപ്രതിരോധ ഗവേഷണ-വികസന വിഭാഗത്തിന്റെ ഭാഗമായി പ്രവർത്തിക്കുന്ന ഇൻസ്റ്റിറ്റ്യൂട്ട് ഓഫ് ന്യൂക്ലിയർ മെഡിസിൻ ആന്റ് എലീഡ് സയൻസസ് ഹൈദരാബാദ് ആസ്ഥാനമാക്കി പ്രവർത്തിക്കുന്ന ഡോക്ടർ റെഡ്ഡീസ് ലാബുമായി സഹകരിച്ചാണ് മരുന്ന് വികസിപ്പിച്ചിരിക്കുന്നത്. പൊടിരൂപത്തിലുള്ള മരുന്ന് വെള്ളത്തിൽ അലിയിച്ചാണ് കഴിക്കേണ്ടത്.
2020 ഏപ്രിൽ മാസത്തിലാണ് 2-ഡിജി മരുന്നിന്റെ വികസനവും പരീക്ഷണവും ആരംഭിച്ചത്. 30 ആശുപത്രികളിലെ രോഗികളിലാണ് മരുന്ന് പരീക്ഷിച്ചത്. 2- ഡിജി കോവിഡ് പരത്തുന്ന സാർസ് കോവ്-2 വൈറസിനെതിരെ വളരെ ഫലപ്രദമാണെന്നാണ് കണ്ടെത്തിയിരിക്കുന്നത്. വൈറസിന്റെ വളർച്ചയെ തടഞ്ഞ് രോഗമുക്തി വേഗത്തിൽ സാധ്യമാക്കുമെന്നും രോഗികൾ കൃത്രിമ ഓക്സിജനെ ആശ്രയിക്കേണ്ട സാഹചര്യം പകുതിയോളം ഒഴിവാക്കുകയും ചെയ്യുമെന്ന് ഗവേഷകർ പറഞ്ഞു.
കോവിഡ് ഗുരുതരമായ രോഗികളിലും ഇടത്തരം രോഗികളിലും 2- ഡിജി ഉപയോഗിക്കാം. വൈറസ് ബാധിച്ച കോശങ്ങളിൽ മാത്രമേ 2- ഡിജി പ്രവർത്തിക്കുയുള്ളൂ. കോവിഡ് ബാധിച്ച കോശങ്ങൾ മരുന്നിനെ സ്വീകരിക്കുന്നതോടെ അവ പ്രവർത്തനരഹിതമായി നശിച്ചുപോവുന്നു. അങ്ങനെ രോഗബാധ കുറയുന്നു.
കോവിഡ് രോഗിക്ക് 2 പാക്കറ്റ് വീതം ദിവസവും നൽകുന്നതിലൂടെ കോവിഡ് രോഗികളിൽ 42% പേർക്കും മൂന്നാം ദിവസം ഓക്സിജൻ സഹായിയുടെ ആവശ്യം ഇല്ലാതായെന്നാണ് ട്രയലിലെ കണ്ടെത്തൽ. സാധാരണ കോവിഡ് ചികിത്സയിൽ 30% ആളുകൾക്കേ മൂന്നാം ദിവസം ഈ മാറ്റമുണ്ടാകൂ. 65 വയസ്സിനു മുകളിലുള്ളവർക്കും ഫലപ്രദമാണ്.
നിലവിലുള്ള ചികിത്സയ്ക്കൊപ്പം അടിയന്തിരഘട്ടങ്ങളിൽ 2- ഡിജി ഉപയോഗിക്കാനുള്ള അനുമതി മെയ് ഒന്നിനാണ് ഡ്രഗ് റെഗുലേറ്റർ നൽകിയത്. മെയ് 17-ന് 2- ഡിജി മരുന്നിന്റെ ആദ്യ ബാച്ച് കേന്ദ്രപ്രതിരോധമന്ത്രി രാജ്നാഥ് സിങ്ങും ആരോഗ്യമന്ത്രി ഹർഷവർധനും ചേർന്ന് പുറത്തിറക്കി. 2- ഡിജി മരുന്നിന് ഒരു സാഷെയ്ക്ക് 990 രൂപയാണ് ഡോക്ടർ റെഡ്ഡീസ് ലാബ് നിശ്ചയിച്ചിരിക്കുന്നത്. സർക്കാർ ആശുപത്രികൾക്കും കേന്ദ്ര-സംസ്ഥാന സർക്കാരുകൾക്കും മരുന്ന് കുറഞ്ഞ നിരക്കിൽ ലഭ്യമാക്കുമെന്ന് കമ്പനി നേരത്തെ വ്യക്തമാക്കിയിട്ടുണ്ട്.
