കടത്തുസ്വർണം കാണാതായ സംഭവം : 2 കസ്റ്റംസ് ഉദ്യോഗസ്ഥർക്ക് സസ്പെൻഷൻ

കരിപ്പൂര്‍ : യാത്രക്കാരന്‍ കടത്തിക്കൊണ്ടുവന്ന സ്വര്‍ണം കാണാതായ സംഭവത്തില്‍ കോഴിക്കോട് വിമാനത്താവളത്തിലെ 2 കസ്റ്റംസ് ഉദ്യോഗസ്ഥരെ സസ്പെന്‍ഡ് ചെയ്തു.കസ്റ്റംസ് സൂപ്രണ്ട് പ്രമോദ് സബിത, ഹവില്‍ദാര്‍ സനിത് എന്നിവരെയാണ് സസ്പെന്‍ഡ് ചെയ്തത്.വിദേശത്തുനിന്ന് അടുത്തിടെ കോഴിക്കോട് വിമാനത്താവളത്തിലെത്തിയ ഷിഹാബ് എന്ന യാത്രക്കാരന്‍ ശരീരത്തില്‍ ഒളിപ്പിച്ച 2 സ്വര്‍ണ ക്യാപ്സ്യൂളുകള്‍ ആണു കാണാതായത്. രഹസ്യ വിവരത്തെത്തുടര്‍ന്ന്, അന്നു ഷിഹാബിനെ പോലീസ് പിടികൂടി ചോദ്യം ചെയ്തെങ്കിലും സ്വര്‍ണം ലഭിച്ചില്ല. ഇയാള്‍ പിന്നീട് നല്‍കിയ മൊഴിയുടെ അടിസ്ഥാനത്തില്‍ നടന്ന തുടരന്വേഷണത്തിലാണ് സ്വര്‍ണം കാണാതായതിനു പിന്നില്‍ കസ്റ്റംസ് ഉദ്യോഗസ്ഥര്‍ക്കു പങ്കുണ്ടെന്നു കണ്ടെത്തിയത്.