പത്തനംതിട്ട : സാമൂഹികപ്രവർത്തക ഡോ.എം.എസ് സുനിൽ ഭവനരഹിതരായി സുരക്ഷിതമല്ലാത്ത കുടിലുകളിൽ കഴിയുന്ന വിധവകളായ സ്ത്രീകളും കുട്ടികളും അടങ്ങിയ കുടുംബത്തിന് പണിത് നൽകുന്ന 249-മത് സ്നേഹഭവനം അരീപ്പറമ്പ് പെരിയോർ പതിക്കൽ വിധവയായ അനിതയ്ക്കും രണ്ടു കുട്ടികൾക്കുമായി കിടങ്ങൂർ പള്ളിയമ്പിൽ പരേതനായ കുഞ്ഞേപ്പിന്റെ ഒന്നാം ചരമ വാർഷികത്തോടനുബന്ധിച്ച് അദ്ദേഹത്തിന്റെ കുടുംബാംഗങ്ങളുടെ സഹായത്താൽ നിർമ്മിച്ചു നൽകി. വീടിന്റെ താക്കോൽ ദാനവും ഉദ്ഘാടനവും കുഞ്ഞേപ്പിന്റെ പത്നി അന്നകുട്ടി ജോസഫ് നിർവഹിച്ചു.
ഒരു കാലിന് സ്വാധീനമില്ലാത്ത അനിത ഭർത്താവ് മരിച്ചതിനു ശേഷം കൊച്ചു കുട്ടികളുമായി തകർന്നു വീഴാറായ സുരക്ഷിതമല്ലാത്ത കുടിലിലായിരുന്നു താമസം. സ്വന്തമായി ഒരു വീട് പണിയുവാൻ മറ്റ് മാർഗങ്ങൾ ഒന്നുമില്ലാതെ കഴിയുന്ന അവസ്ഥ നേരിൽ കാണുവാൻ ഇടയായ ടീച്ചർ ഇവർക്കായി രണ്ടു മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ ഒരു വീട് പണിത് നൽകുകയായിരുന്നു. ചടങ്ങിൽ വാർഡ് മെമ്പർ പൊന്നമ്മ.എസ്, പ്രോജക്റ്റ് മാനേജർ കെ.പി ജയലാൽ, റോയി ജോസഫ്, ലിസി ജോസഫ്, തൈപ്പറമ്പിൽ തങ്കച്ചൻ, ലൈലമ്മ ജോൺ എന്നിവർ പ്രസംഗിച്ചു.