റാന്നി : മദ്യപിച്ചെത്തിയ സംഘം കെ.എസ്.ആര്‍.ടി.സി ജീവനക്കാരെ മര്‍ദ്ദിച്ചതായി പരാതി. ഇവരറിയിച്ചതനുസരിച്ച് സ്ഥലത്തെത്തിയ പോലീസ് സംഘര്‍ഷം സൃഷ്ടിച്ച അഞ്ചു പേരെ പിടികൂടി. തിരുവനന്തപുരം സ്വദേശിളായ ശരത്, വിഷ്ണു, ശ്രീക്കുട്ടന്‍, ജിതിന്‍ എന്നിവരാണ് പോലീസ് പിടിയിലായത്. ചൊവ്വാഴ്ച രാത്രി ഒമ്പതു മണിയോടെ കെ.എസ്.ആര്‍.ടി.സി റാന്നി ഓപ്പറേറ്റിംങ് സെന്‍ററിലെ ഗ്യാരേജിലാണ് സംഭവം. ഓട്ടം കഴിഞ്ഞ് പാര്‍ക്കു ചെയ്തിരുന്ന ബസിന്‍റെ ടയറില്‍ പുറത്തു നിന്നെത്തിയ സംഘം മൂത്രമൊഴിച്ചതോടാണ് തര്‍ക്കം ആരംഭിച്ചത്.
ഇതു ചോദ്യം ചെയ്ത ജീവനക്കാരെ ഇവര്‍ അസഭ്യം പറയുകയും പിന്നീട് കൈയ്യേറ്റം ചെയ്യുകയുമായിരുന്നു. ഇവരെ മര്‍ദ്ദിക്കുന്നത് തടയാന്‍ ശ്രമിച്ച സമീപത്തെ വ്യാപാരിയേയും വര്‍ക്കു ഷോപ്പ് ജീവനക്കാരനേയും സംഘം മര്‍ദ്ദിച്ചു. പോലീസിനെ വിവരമറിയിച്ചെങ്കിലും എത്താന്‍ വൈകിയതായും ആരോപണം ഉണ്ട്. അസഭ്യം വിളിച്ചതിനും പൊതുസ്ഥലത്ത് സംഘര്‍ഷം ഉണ്ടാക്കിയതിനും സംഘത്തിനെതിരെ കേസെടുത്തതായി റാന്നി പോലീസ് അറിയിച്ചു.
