കൊല്ലം : കടലില് കുളിക്കാനിറങ്ങി കാണാതായ രണ്ട് വിദ്യാര്ത്ഥികളുടെ മൃതദേഹങ്ങള് കണ്ടെത്തി. ചവറ പന്മന മിടാപ്പള്ളി കൊച്ച് കാരാതറയില് ഉഷാകുമാരിയുടെ മകന് ജയകൃഷ്ണന് (17), പന്മന വടക്കുംതല പാലവിള കിഴക്കതില് പരേതനായ ബിജു- സുനിത ദമ്പതികളുടെ മകന് ബിനീഷ് ( 16) എന്നിവരുടെ മൃതദേഹങ്ങളാണ് കണ്ടെത്തിയത്. ചൊവ്വാഴ്ച ചവറ കോവില്ത്തോട്ടം 132 ഭാഗത്തായിട്ടാണ് പ്ലസ്ടു ഫലം അറിഞ്ഞ ശേഷം കൂട്ടുകാരുമൊത്ത് ഇവര് കുളിക്കാനായി ഇറങ്ങിയത്. മറ്റ് മൂന്ന് പേരായ വടുതല സ്വദേശി സിബിന് (17), കളരി സ്വദേശി വിജില് (20), വടക്കുംതല സ്വദേശി അഭിരാജ് (17) എന്നിവര് കരയില് നില്ക്കുകയായിരുന്നു.
ഇതിനിടയില് ജയകൃഷ്ണനും ബിനീഷും സമീപത്ത് കിടന്നിരുന്ന തെര്മോകോള് ഷീറ്റുപയോഗിച്ച് കടലില് ഇറങ്ങി കുളിക്കാന് ശ്രമിക്കുന്നതിനിടയില് തിരയില്പ്പെട്ട് മുങ്ങി താഴുകയായിരുന്നുവെന്ന് സുഹൃത്തുക്കള് പറഞ്ഞു ശക്തമായ തിരമാല ഉള്ളതിനാല് രാത്രി തെരച്ചില് അവസാനിപ്പിക്കുകയായിരുന്നു. ഇന്ന് രാവിലെ വീണ്ടും പ്രദേശവാസികളും ബന്ധുക്കളും തീരത്ത് നടത്തിയ തിരച്ചിലിലാണ് മൃതദേഹങ്ങള് കണ്ടെത്തിയത്. പോലീസ് എത്തി ഇന്ക്വസ്റ്റ് തയാറാക്കി മൃതദേഹങ്ങള് ആശുപത്രിയിലേക്ക് മാറ്റി.