പത്തനംതിട്ട : നടൻ എം.ജി.സോമന്റെ സ്മരണയുമായി ബന്ധപ്പെട്ട് എം.ജി.സോമൻ ഫൗണ്ടേഷൻ ഒരുമാസം നീളുന്ന പരിപാടികൾ സംഘടിപ്പിക്കുന്നു. സോമൻ വിടവാങ്ങിയിട്ട് ഇക്കൊല്ലം 25 വർഷം പൂർത്തിയാകുകയാണ്. നവംബർ 17-ന് ലഹരിക്കെതിരേയുള്ള തെരുവുനാടക ബോധവത്കരണ പരിപാടിയോടെയാണ് തുടക്കം.
കരുനാഗപ്പള്ളി നാടകശാല അവതരിപ്പിക്കുന്ന ‘അരുത് ലഹരി’ എന്ന ലഹരിവിരുദ്ധ തെരുവുനാടകം 17, 18 തീയതികളിൽ തിരുവല്ലയിലും പരിസരങ്ങളിലുമായി 12 ഇടങ്ങളിൽ അവതരിപ്പിക്കും. 19-ന് ഇരുവള്ളിപ്ര സെന്റ് തോമസ് ഹയർ സെക്കൻഡറി സ്കൂൾ, ബാലികാമഠം ഹയർ സെക്കൻഡറി സ്കൂൾ എന്നിവിടങ്ങളിൽ സ്കൂൾ വിദ്യാർഥികൾക്ക് കലാമത്സരങ്ങൾ നടത്തും. 25, 26 തീയതികളിൽ തിരുവല്ല മാർത്തോമാ കോളേജിൽ യുവാക്കൾക്ക് നാടകക്കളരി നടക്കും.
25-ന് 9.30-ന് സംവിധായകൻ ശ്യാമപ്രസാദ് കളരി ഉദ്ഘാടനംചെയ്യും. ഡിസംബർ രണ്ട്, മൂന്ന് തീയതികളിൽ അമച്വർ നാടക മത്സരം. രണ്ടിന് തിരുവല്ല സെന്റ് ജോൺസ് ഓഡിറ്റോറിയത്തിൽ നാടകമത്സരം നടനും തിരക്കഥാകൃത്തുമായ രഞ്ജി പണിക്കർ ഉദ്ഘാടനം ചെയ്യും. സോമന്റെ ചരമദിനമായ ഡിസംബർ 12-ന് തിരുമൂലപുരത്തെ വീട്ടിൽ ആസാദ് നഗർ റെസിഡൻസ് അസോസിയേഷന്റെ നേതൃത്വത്തിൽ പുഷ്പാർച്ചന.
