പത്തനംതിട്ട : ബംഗ്ലാദേശില് കപ്പല് റിപ്പയര് ചെയ്യുന്നതിനിടെ രണ്ടു മലയാളി യുവാക്കള് ടാങ്കില് വീണ് മരിച്ചു. കോന്നി സ്വദേശി അഖില് ശേഖര് (26), ജിഷ്ണു രാജ് എന്നിവരാണ് മരിച്ചത്. ശനിയാഴ്ച രാവിലെ ചിറ്റഗോങിലാണ് അപകടം ഉണ്ടായത്. കോന്നി മങ്ങാരം താഴത്ത് വീട്ടില് ശേഖറിന്റെയും അജിതയുടെയും മകനാണ് അഖില്. ഒപ്പമുണ്ടായിരുന്ന ജിഷ്ണു രാജ് എന്ന മലയാളി യുവാവും മരിച്ചിട്ടുണ്ട്.
തേക്കുതോട് സ്വദേശികളായ അഖിലിന്റെ കുടുംബം ഇപ്പോള് കോന്നി ഡി.എഫ്.ഓഫിസിനു സമീപമാണ് താമസിക്കുന്നത്. ഭാര്യ : ആരതി. കഴിഞ്ഞ ആറിനാണ് നാട്ടില് അവധിക്കെത്തിയ അഖില് തിരികെ ബംഗ്ലാദേശിലേക്ക് മടങ്ങിയത്. അടുത്ത ആഴ്ച നാട്ടിലേക്ക് വരാനിരിക്കെയാണ് മരണം.