കൊച്ചി : ഗുരുതര പരിക്കേറ്റ നിലയില് ആശുപത്രിയില് പ്രവേശിപ്പിച്ച രണ്ട് വയസുകാരിയുടെ അമ്മയും മുത്തശ്ശിയും ജീവനൊടുക്കാന് ശ്രമിച്ചു. കൈയിലെ ഞരമ്പ് മുറിക്കാന് ഇരുവരും ശ്രമിച്ചു. ഇവരുടെ ആരോഗ്യനില തൃപ്തികരമാണെന്ന് ആശുപത്രി അധികൃതര് അറിയിച്ചു. അതേസമയം കുട്ടിയുടെ ആരോഗ്യനിലയില് കാര്യമായ പുരോഗതിയുണ്ടെന്ന് ഡോക്ടര്മാര് വ്യക്തമാക്കി. കഴിഞ്ഞ ദിവസമാണ് കുട്ടിയെ അമ്മയും മുത്തശിയും ഗുരുതര പരിക്കുകളോടെ കോലഞ്ചേരി മെഡിക്കല് കോളജ് ആശുപത്രിയില് പ്രവേശിപ്പിച്ചത്. കുട്ടിയുടെ കൈ ഒടിഞ്ഞ നിലയിലും ശരീരത്തില് പൊള്ളലേറ്റിട്ടുമുണ്ടായിരുന്നു. കുട്ടിയുടെ തലയ്ക്കും പരിക്കേറ്റതായി ഡോക്ടര്മാര് പറഞ്ഞിരുന്നു. പോലീസ് നടത്തിയ ചോദ്യം ചെയ്യലില് വ്യത്യസ്ത മറുപടികളാണ് അമ്മയും മുത്തശ്ശിയും നല്കിയത്. സംഭവത്തില് പോലീസ് കൂടുതല് അന്വേഷണം നടത്തി വരികയാണ്.
