ന്യൂഡല്ഹി : വാഹനങ്ങള് തമ്മില് ഉരസിയതിനെച്ചൊല്ലിയുണ്ടായ സംഘര്ഷം വെടിവെപ്പില് കലാശിച്ചു. സംഭവത്തില് മൂന്നുപേര്ക്ക് പരിക്കേറ്റു. വടക്കന് ഡല്ഹിയിലെ ചെങ്കോട്ട മേഖലക്ക് സമീപമാണ് സംഭവം. ആബിദ്, അമന്, ദിഫറാസ് എന്നിവര്ക്കാണ് പരിക്കേറ്റതെന്ന് പോലീസ് പറഞ്ഞു. ഇവരുടെ കാലിനും തുടക്കും മുതുകിനും പരിക്കേറ്റതായും ആശുപത്രിയില് ചികിത്സയിലാണെന്നും കൂട്ടിച്ചേര്ത്തു. ഇവരുടെ ആരോഗ്യനില തൃപ്തികരമാണ്. തിങ്കളാഴ്ച രാത്രിയാണ് സംഭവം.
വാഹനങ്ങളുടെ പാര്ട്സ് വില്പ്പനക്കാരനായ മുഹമ്മദ് ഷാഹിദ് ഭാര്യയോടൊപ്പം ബൈക്കില് വീട്ടിലേക്ക് വരികയായിരുന്നു. അങ്കൂരി ബാഗ് ഏരിയയിലെ വീടിന് സമീപം എത്തിയപ്പോള് എതിര്ദിശയില്നിന്ന് വന്ന ഇരുചക്രവാഹനം ഇവരുടെ ബൈക്കില് ഉരസി. രണ്ടുപേരാണ് വാഹനത്തില് ഉണ്ടായിരുന്നത്. ഷാഹിദിന്റെ വാഹനത്തിന് ചെറിയ കേടുപാടുകള് സംഭവിച്ചു. തന്റെ വാഹനം നന്നാക്കിത്തരണമെന്ന് ഷാഹിദ് യുവാക്കളോട് ആവശ്യപ്പെട്ടു. ഇതോടെ തര്ക്കമായി. അങ്കൂരി ബാഗ് പ്രദേശത്തെ നാട്ടുകാരും സ്ഥലത്ത് തടിച്ചുകൂടി. യുവാക്കളില് ഒരാള് തന്റെ സഹോദരനെ സംഭവം അറിയിച്ചു.
ഇതിനിടെ യുവാക്കള് രക്ഷപ്പെടാന് ശ്രമിച്ചതോടെ നാട്ടുകാര് പിടികൂടി. ഇവിടേക്ക് വന്ന യുവാക്കളുടെ സുഹൃത്തുക്കള് നാട്ടുകാര്ക്ക് നേരെ വെടിയുതിര്ക്കുകയായിരുന്നു. അഞ്ച് റൗണ്ടാണ് വെടിയുതിര്ത്തത്. ഒന്ന് വായുവിലേക്കും നാലെണ്ണം നാട്ടുകാരെ ലക്ഷ്യമിട്ടും വെടിവെച്ചു. ഷാഹിദിന്റെ സഹോദരന് ആബിദ് ഉള്പ്പെടെ മൂന്നുപേര്ക്കാണ് പരിക്കേറ്റത്. എല്ലാവരെയും അടുത്തുള്ള ആശുപത്രിയില് പ്രവേശിപ്പിച്ചു. സംഭവം സി.സി.ടി.വി ക്യാമറയില് പതിഞ്ഞിട്ടുണ്ട്. പ്രതികള്ക്കെതിരെ വധശ്രമത്തിനാണ് കേസെടുത്തിട്ടുണ്ടെന്ന് ഡെപ്യൂട്ടി പോലീസ് കമ്മീഷണര് (നോര്ത്ത്) സാഗര് സിംഗ് കല്സി പറഞ്ഞു.
