തൃശൂര് : നഗരത്തില് നിര്ത്തിയിട്ട ലോറിയില്നിന്ന് മൂന്ന് ലക്ഷം രൂപ മോഷണം പോയി. തൃശൂര് ജയ്ഹിന്ദ് മാര്ക്കറ്റില് കപ്പലണ്ടിയുമായെത്തിയ ലോറിയില് നിന്നുമാണ് പണം കവര്ന്നത്. വാഹന ഡ്രൈവര് കൊല്ലങ്കോട് സ്വദേശി സുദേവ് പോലീസില് പരാതി നല്കി. അര്ധരാത്രിയോടെയാണ് സുദേവ് കപ്പലണ്ടിയുമായി മാര്ക്കറ്റിലെത്തിയത്. ചരക്ക് ഇറക്കാനായി ഇവിടെ നിര്ത്തിയിട്ടിരിക്കുകയായിരുന്നു ലോറി. ലോറിയുടെ ഡ്രൈവര് കാബിനിലെ ഡാഷില് സൂക്ഷിച്ചിരുന്ന പണമാണ് നഷ്ടപ്പെട്ടത്.
വ്യാപാര സ്ഥാപനങ്ങള് കുത്തിത്തുറന്നുള്ള കവര്ച്ചകള് ഒതുങ്ങിയതോടെ വാഹനങ്ങള് കേന്ദ്രീകരിച്ചുള്ള കവര്ച്ചകള് പെരുകിയിരിക്കുകയാണ്. തൃശൂര് നഗരത്തില് ചരക്ക് ലോറികളിലെ കവര്ച്ച വ്യാപകമാകുകയാണ്. നഗരത്തില് ഒന്നര മാസത്തിനിടയില് മാത്രം 14 ചരക്ക് ലോറികളില് നിന്നാണ് ബാറ്ററികള് കവര്ന്നതായി പോലീസിന് ലഭിച്ച പരാതികളിലുള്ളത്.