ന്യൂഡല്ഹി: കര്ണാടകയിലെ 4000 കോടി രൂപയുടെ ഐ -മോണിറ്ററി അഡ്വൈസറിയുടെ പോന്സി അഴിമതിയുമായി ബന്ധപ്പെട്ട് കോണ്ഗ്രസിന്റെ മുന് മന്ത്രി റോഷന് ബേഗ് അറസ്റ്റില്. കോടതിയില് ഹാജരാക്കിയ അദ്ദേഹത്തെ 14 ദിവസത്തേക്ക് ജുഡീഷ്യല് കസ്റ്റഡിയില് വിട്ടു.
വ്യക്തമായ തെളിവുകളുടെ അടിസ്ഥാനത്തിലാണ് റോഡന് ബേഗിനെ അറസ്റ്റ് ചെയ്തതെന്ന് സി.ബി.ഐ അറിയിച്ചു. റോഷന് ബേഗിനെ എം.എല്.എ സ്ഥാനത്തുനിന്ന് അയോഗ്യനാക്കിയിരുന്നു. 2019 ജൂണില് കോണ്ഗ്രസ് റോഷനെ സസ്പെന്ഡ് ചെയ്യുകയും ചെയ്തിരുന്നു. നിക്ഷേപകര്ക്ക് വന് ലാഭം വാഗ്ദാനം ചെയ്ത് കോടിക്കണക്കിന് രൂപ തട്ടിയെടുത്തുവെന്നതാണ് കേസ്.
ബംഗളൂരു ആസ്ഥാനമായി പ്രവര്ത്തിക്കുന്ന ഐ.എം.എ ഗ്രൂപ്പ് പോണ്സി നിക്ഷേപ പദ്ധതിവഴി കോടിക്കണക്കിന് രൂപ തട്ടിയെടുത്തതിലായിരുന്നു സി.ബി.ഐ അന്വേഷണം. നിക്ഷേപകര്ക്ക് പണം നഷ്ടമാകുകയും സ്ഥാപകനായ മന്സൂര് ഖാന് വിദേശത്തേക്ക് കടക്കുകയുമായിരുന്നു. ഇതോടെ ആയിരക്കണക്കിന് നിക്ഷേപകള് വഞ്ചിക്കപ്പെട്ടു. മന്സൂര് ഖാനെ പിന്നീട് അറസ്റ്റ് ചെയ്തു. റോഷന് 400 കോടി കൈമാറിയെന്നും തിരികെ നല്കിയില്ലെന്നും പറയുന്ന ഓഡിയോ മന്സൂര് വിദേശത്തുവെച്ച് പുറത്തുവിട്ടിരുന്നു. എന്നാല് ആരോപണങ്ങള് റോഷന് ബേഗ് നിഷേധിച്ചു. എങ്കിലും സി.ബി.ഐ അന്വേഷണം റോഷനിലേക്കും നീളുകയായിരുന്നു.
