ആലപ്പുഴ : ആലപ്പുഴ പാണാവള്ളിയിൽ 64 കാരനെ തെങ്ങിൽ കെട്ടിയിട്ട് മർദിച്ചു. തൃച്ചാറ്റുകുളം സ്വദേശി വിജയനാണ് മർദനമേറ്റത്. അയൽവാസികൾ തമ്മിലുള്ള തർക്കമാണ് കാരണം. സംഭവത്തിൽ ഒരു കുടുംബത്തിലെ ആറു പേർക്കെതിരെ പോലീസ് കേസെടുത്തു. വിജയനെ തെങ്ങിൽ കെട്ടിയിട്ട് മർദിക്കുന്നതാണ് ദൃശ്യം പുറത്തുവന്നു. വെള്ളിയാഴ്ചയാണ് സംഭവം ഉണ്ടായത്. അയൽവാസികൾ തമ്മിലുള്ള തർക്കത്തിൽ നേരത്തെ വിജയനെ ആക്രമിച്ചതിന് കേസുണ്ട്. കേസിന്റെ വിചാരണ നടക്കുകയാണ്. കേസ് കൊടുത്തതിലെ വിരോധമുൾപ്പടെ അയൽവാസിയായ സത്താറിനും കുടുംബത്തിനും വിജയനോട് ഉണ്ട്.
തുടർന്ന് കഴിഞ്ഞ ദിവസം രാത്രി സത്താറും ഭാര്യയും മക്കളും ചേർന്ന് വിജയനെ ആക്രമിക്കുകയായിരുന്നു. വിജയന്റെ ഉടുമുണ്ടഴിച്ചു തെങ്ങിൽ കെട്ടിയിട്ടായിരുന്നു മർദനം. തടയാൻ എത്തിയ വിജയന്റെ കുടുംബാംഗങ്ങൾക്കും പരിക്കേറ്റു. സത്താർ ഉൾപ്പടെ ആറുപേർക്കെതിരെ പൂച്ചാക്കൽ പോലീസ് കേസെടുത്തു. പ്രതികളായ സത്താറിന്റെ മക്കൾ നാലുപേർ പ്രായപൂർത്തിയാകാത്തവരാണ്. പ്രതികൾ ഒളിവിലാണ്.
