കൊല്ലം : പ്രാക്കുളത്ത് ആറാം ക്ലാസ് വിദ്യാര്ഥിനിയെ ആത്മഹത്യ ചെയ്ത നിലയില് കണ്ടെത്തിയ സംഭവത്തില് കഞ്ചാവ് മാഫിയക്ക് പങ്കെന്ന് സംശയം. പ്രാക്കുളം പനയ്ക്കല് മുഹമ്മദ് കുഞ്ഞിന്റെ മകള് അമീനയെയാണ് കഴിഞ്ഞ ദിവസം മരിച്ച നിലയില് കണ്ടെത്തിയത്. വൈകീട്ട് വീട്ടിനുള്ളില് തൂങ്ങിയ നിലയില് കണ്ടെത്തുകയായിരുന്നു. കുട്ടിയുടെ കുടുംബമാണ് ആരോപണങ്ങള് ഉന്നയിച്ച് രംഗത്തെത്തിയിരിക്കുന്നത്.
എന്ത് കാരണമുണ്ടായാലും കുട്ടി ഇങ്ങനെ ചെയ്യില്ലെന്നാണ് അമ്മ അനീഷയും പറയുന്നത്. പ്രദേശത്ത് കഞ്ചാവ് മാഫിയയുടെ സാന്നിധ്യമുണ്ടെന്നാണ് പ്രദേശവാസികള് പറയുന്നത്. കുട്ടിയുടെ പിതാവിന്റെ സുഹൃത്തുക്കളിലേക്കുതന്നെയാണ് സംശയത്തിന്റെ മുന നീളുന്നത്. സംഭവം വിശദമായി പരിശോധിക്കുമെന്ന് പോലിസ് അറിയിച്ചു. പോസ്റ്റുമോര്ട്ടം റിപ്പോര്ട്ട് ലഭിച്ചാലേ കൂടുതല് കാര്യങ്ങള് വ്യക്തമാകൂ. കുട്ടിയുടെ പുസ്തകത്തില്നിന്ന് ലഭിച്ച ആത്മഹത്യാക്കുറിപ്പ് പോലിസ് പരിശോധിച്ചു വരികയാണ്.
വീടിന് പുറത്ത് അമ്മയെ ജോലിയില് സഹായിക്കുന്നതിനിടെ വീട്ടില്പോയി പ്രാര്ഥന നടത്താന് ആവശ്യപ്പെട്ടു. ഇതനുസരിച്ച് അമീന വീട്ടിലേക്കുപോയി. വീടിന് പുറത്ത് ജോലിചെയ്തിരുന്ന അമ്മ തിരികെ എത്തിയപ്പോഴാണ് കുട്ടിയെ തൂങ്ങിയ നിലയില് കണ്ടത്. ഉടന് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. തകരഷീറ്റ് കൊണ്ട് മറച്ച വീട്ടില് മാതാപിതാക്കളും മൂന്ന് കുട്ടികളുമാണുള്ളത്. കുടുംബത്തിലെ മൂത്ത കുട്ടിയാണ് അമീന. ഓണ്ലൈന് പഠനസൗകര്യം ഇല്ലാത്തതിനാലാണ് കുട്ടി ആത്മഹത്യ ചെയ്തതെന്ന് അഭ്യൂഹങ്ങളുണ്ടായിരുന്നു. എന്നാല് കഴിഞ്ഞദിവസവും സമീപത്തെ ലൈബ്രറിയിലെത്തി അമീന ഓണ്ലൈന് ക്ലാസുകളില് പങ്കെടുത്തിരുന്നുവെന്ന് വ്യക്തമായി.
