കൊല്ലം: കടയിൽ പോയി മടങ്ങിയ വയോധികയെ പൂവൻ കോഴി തലങ്ങും വിലങ്ങും ആക്രമിച്ചു. കൊട്ടാരക്കര പൂയപ്പള്ളിയിൽ ആണ് സംഭവം നടന്നത്. പൂയപ്പള്ളി മരുതമൺപള്ളി സുജിത്ത് ഭവനിൽ 74കാരിയായ ജോയിസിനാണ് പൂവൻ കോഴിയുടെ ആക്രമണത്തിൽ മുഖത്ത് സാരമായി പരിക്കേറ്റത്. വയോധികയുടെ മുഖത്ത് 12 തുന്നലുകളുണ്ട്. കഴിഞ്ഞ ദിവസം രാവിലെയായിരുന്നു കോഴിയുടെ ആക്രമണം. സമീപത്തെ കടയിൽ പോയി വീട്ടിലേക്കു മടങ്ങുമ്പോഴാണ് കോഴി ജോയിസിന് മേൽ ചാടിക്കയറിയത്. തലയിൽ കയറിയ ശേഷം തലയിലും മൂക്കിന്റെ വശത്തും ഇടതു പുരികത്തിനു സമീപവും കൊത്തി പരിക്കേൽപ്പിക്കുകയായിരുന്നു.
ജോയ്സിന്റെ നിലവിളി കേട്ട് സമീപവാസി ഓടി എത്തിയപ്പോഴേക്കും ജോയിസ് ചോരയിൽ കുളിച്ചു കഴിഞ്ഞു. അപ്പോഴും തലയിൽ കയറിയ പൂവൻകോഴി കൊത്തിക്കൊണ്ടിരുന്നു. കോഴിയെ ഓടിച്ച ശേഷം ഉടൻ തന്നെ ജോയ്സിനെ പാരിപ്പള്ളി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. വീട്ടുകാർ പൂയപ്പള്ളി പോലീസിൽ പരാതി നൽകിയെങ്കിലും കോഴിയെ കോടതി കേറ്റാൻ മനസില്ലാതെ ജോയിസ് കോഴിയോട് ക്ഷമിച്ചു.
