മല്ലപ്പള്ളി : എട്ടാമത് ജില്ലാ പുസ്തകമേള 24 മുതൽ 27 വരെ മണിമലയാറ്റിലെ മല്ലപ്പള്ളി വലിയപാലത്തിന് സമീപം യൂണിയൻ ക്രിസ്ത്യൻ കൺവെൻഷൻ ഹാളിൽ നടക്കും. ക്ഷേത്രപ്രവേശന വിളംബരസ്മാരക ശ്രീചിത്തിര തിരുനാൾ സാംസ്കാരിക സമിതിയുടെ ആഭിമുഖ്യത്തിൽ ജില്ലയിലെ ത്രിതല പഞ്ചായത്തുകളുടെയും ഇതരസംഘടനകളുടെയും സഹകരണത്തോടെയാണ് പരിപാടി. ബുധനാഴ്ച 12-ന് നിയമസഭാ ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. സമിതി ചെയർമാൻ സുരേഷ് ചെറുകര അധ്യക്ഷതവഹിക്കും. 26-ന് രാവിലെ 11-ന് ചേരുന്ന ദേശീയോദ്ഗ്രഥന യോഗം ആന്റോ ആന്റണി എം.പി. ഉദ്ഘാടനം ചെയ്യും. കല, കായികം, ശാസ്ത്രം, സാഹിത്യം, കാരുണ്യം എന്നീ വിഷയങ്ങളിൽ സെമിനാറുകളും ചർച്ചാ ക്ളാസുകളും നടത്തും. രാജ്യസഭാ മുൻ ഉപാധ്യക്ഷൻ പ്രൊഫ.പി.ജെ. കുര്യൻ, എം.എൽ.എ.മാരായ മാത്യു ടി.തോമസ്, പ്രമോദ് നാരായൺ, മുൻ എം.എൽ.എ.മാരായ ജോസഫ് എം.പുതുശ്ശരി, രാജു എബ്രഹാം തുടങ്ങിയവർ ഇതരദിവസങ്ങളിലെ വിവിധയോഗങ്ങൾ ഉദ്ഘാടനം ചെയ്യും.
ശനിയാഴ്ച വൈകിട്ട് മൂന്നിനാണ് സമാപന സമ്മേളനം. സംസ്ഥാന കലോത്സവത്തിൽ മികച്ചസ്ഥാനം നേടിയ ജില്ലയിലെ കുരുന്നുകൾ അവരുടെ കഴിവുകൾ കാഴ്ചവെയ്ക്കും. മാതൃഭൂമി അടക്കമുള്ള പ്രസാധകരുടെ പുസ്തകങ്ങൾ മേളയിൽ ലഭിക്കും. പുസ്തകങ്ങൾക്ക് 10 മുതൽ 50 ശതമാനംവരെ വിലക്കിഴിവുണ്ട്. വിദ്യാലയങ്ങൾക്കും വായനശാലകൾക്കും പ്രത്യേക ഇളവുകൾ ലഭിക്കും. വാങ്ങുന്നവരുടെ കൂപ്പണുകൾ നറുക്കെടുത്ത് ആയിരത്തിലധികം രൂപയുടെ പുസ്തകങ്ങൾ സമ്മാനമായി നൽകുമെന്ന് സമിതി ചെയർമാൻ സുരേഷ് ചെറുകര, വൈസ് ചെയർമാൻ പ്രൊഫ. ജേക്കബ് എം.എബ്രഹാം, ഖജാൻജി രാജേഷ് ജി.നായർ തുടങ്ങിയവർ പറഞ്ഞു.
