പത്തനംതിട്ട : കോവിഡും കാലവര്‍ഷവും അടവി കുട്ടവഞ്ചി സവാരി കേന്ദ്രത്തിന്റെ വരുമാനത്തേയും സാരമായി ബാധിച്ചു. കൊവിഡ് വ്യാപന സാധ്യത കണക്കിലെടുത്ത് തണ്ണിത്തോട് ഗ്രാമപഞ്ചായത്ത് കണ്ടെയ്മെന്റ് സോണിൽ ആക്കിയതിന് ശേഷം കഴിഞ്ഞ പതിനേഴാം തീയതിയായിരുന്നു കുട്ടവഞ്ചി സവാരി കേന്ദ്രം വീണ്ടും തുറന്ന് പ്രവർത്തനമാരംഭിച്ചത്.
എന്നാൽ ശക്തമായ മഴയും കാലാവസ്ഥ വ്യതിയാനവും കുട്ടവഞ്ചി സവാരിയുടെ സുഗമമായ നടത്തിപ്പിനെ സാരമായി ബാധിച്ചിരിക്കുകയാണ്. കൊവിഡ് പശ്ചാത്തലത്തിൽ സമ്പൂർണ്ണ ലോക്ഡൗൺ പ്രഖ്യാപിച്ച സമയത്ത് കുട്ടവഞ്ചി സവാരി കേന്ദ്രം പൂർണ്ണമായി അടച്ചിട്ടിരുന്നു. മഴയുടെ ശക്തികുറഞ്ഞ് സഞ്ചാരികളുടെ വരവ് വർധിച്ചെങ്കിൽ മാത്രമേ കുട്ടവഞ്ചി സവാരി കേന്ദ്രം പൂർണ്ണമായി പ്രവർത്തനസജ്ജമാകൂ.
