മണ്ണാര്‍ക്കാട് : പ്രായപൂര്‍ത്തിയാവാത്ത പെണ്‍കുട്ടിയെ പീഡിപ്പിച്ചെന്ന കേസില്‍ ജൂനിയര്‍ ഹെല്‍ത്ത് ഇന്സ്പെക്ടര് അറസ്റ്റില്‍. കോട്ടോപ്പാടം പ്രാഥമികാരോഗ്യകേന്ദ്രത്തിലെ ജെ.എച്ച്.ഐ. സുരേഷ് ജോര്‍ജ് വര്‍ഗീസ് (42) ആണ് ബാലപീഡന നിരോധന (പോക്സോ) നിയമത്തിലെ വകുപ്പുകള്‍പ്രകാരം അറസ്റ്റിലായത്.
പീഡനത്തിനുശേഷം കടുത്ത മാനസികസംഘര്‍ഷത്തിലായിരുന്ന കുട്ടിയെ കൗണ്‍സലിങ്ങിന് വിധേയയാക്കിയപ്പോഴാണ് വിവരം പുറത്തറിഞ്ഞത്. ചൈല്‍ഡ് ലൈന്‍ പ്രവര്‍ത്തകര്‍ നല്‍കിയ പരാതിയുടെ അടിസ്ഥാനത്തില്‍ പോലീസ് പെണ്‍കുട്ടിയുടെ മൊഴി രേഖപ്പെടുത്തി.
നഞ്ചപ്പനഗറിലുള്ള വീട്ടില്‍നിന്ന് വെള്ളിയാഴ്ച രാവിലെയാണ് സുരേഷിനെ അറസ്റ്റുചെയ്തതെന്ന് പോലീസ് പറഞ്ഞു. സി.ഐ അജിത്ത്‌കുമാര്‍, എസ്.ഐ ജസ്റ്റിന്‍, എ.എസ്.ഐ വിജയമണി, സി.പി.ഒ മാരായ കമറുദീന്‍, ഷഫീക്ക്, മനോജ് എന്നിവരുടെ നേതൃത്വത്തിലായിരുന്നു നടപടി. മണ്ണാര്‍ക്കാട് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
