മുംബൈ : ആഴക്കടലിൽ പാകിസ്താന് പുറമെ ചൈനയും ഇന്ത്യയ്ക്ക് വെല്ലുവിളിയെന്ന് വൈസ് അഡ്മിറൽ ആർ.ഹരികുമാർ. ഇത്തരം വെല്ലുവിളികളെ നേരിടാൻ നാവികസേനയുടെ പ്രവർത്തനം ശക്തിപ്പെടുത്തുമെന്നും അദ്ദേഹം പറഞ്ഞു. ഐ.എൻ.എസ് വിരാടിനൊപ്പമുണ്ടായിരുന്ന കാലഘട്ടം ഏറെ ആസ്വദിച്ചിരുന്നുവെന്നും മലയാളിയായ ആർ.ഹരികുമാർ പറഞ്ഞു. നാവികസേന മേധാവിയായി തെരഞ്ഞെടുക്കപ്പെട്ടതിന് ശേഷം ആദ്യമായാണ് ഒരു മാധ്യമത്തിനോട് അദ്ദേഹം പ്രതികരിക്കുന്നത്. നാവികസേനയുടെ മേധാവിയായി തെരഞ്ഞെടുക്കപ്പെട്ടതിൽ അഭിമാനവും സന്തോഷവുമുണ്ടെന്നും ആർ.ഹരികുമാർ പറഞ്ഞു.
ഓരോ ഘട്ടത്തിലും സഹപ്രവർത്തകരുടെയും സുഹൃത്തുക്കളുടെയും പിന്തുണ ലഭിച്ചിരുന്നു. ഇതിനൊപ്പം ദൈവാനുഗ്രഹം കൂടിയുള്ളതിനാലാണ് ഇതുവരെയെത്താൻ സാധിച്ചതെന്നും അദ്ദേഹം പറഞ്ഞു. 2008 ന് ശേഷം പാകിസ്താനെ കൂടാതെ ചൈനയും ആഴക്കടലിൽ ഇന്ത്യയ്ക്ക് വെല്ലുവിളി ഉയർത്തുന്നതായി നിയുക്ത നാവികസേന മേധാവി പറഞ്ഞു. ആഴക്കടലിലെ വെല്ലുവിളികളെ നേരിടുന്നതിനായി നാവികസേയുടെ പ്രവർത്തനം കൂടുതൽ ശക്തിപ്പെടുത്തുമെന്നും അതിനായിരിക്കും തന്റെ പ്രഥമ പരിഗണനയെന്നും ഹരികുമാർ പ്രതികരിച്ചു.