കോഴിക്കോട്‌ : തെരഞ്ഞെടുപ്പില്‍ സിറ്റിങ് സീറ്റുകളിലെ തോല്‍വിയുമായി ബന്ധപ്പെട്ട്‌ നടപടിക്ക്‌ മുസ്ലിംലീഗ്‌. തോല്‍വി സംബന്ധിച്ച്‌ റിപ്പോര്‍ട്ട്‌ ലഭിച്ചതായി സംസ്ഥാന ജനറല്‍ സെക്രട്ടറിയുടെ ചുമതലയുള്ള പി.എം.എ സലാം പറഞ്ഞു. റിപ്പോര്‍ട്ട്‌ 27ന് ചേരുന്ന സംസ്ഥാന പ്രവര്‍ത്തകസമിതി ചര്‍ച്ചചെയ്‌താകും ഭാവി നടപടി. 12 മണ്ഡലങ്ങളിലെ പരാജയം സംബന്ധിച്ച റിപ്പോര്‍ട്ടാണ്‌ ശനിയാഴ്‌ച ലഭിച്ചത്‌.
ഇതില്‍ അഴീക്കോട്‌, കുറ്റ്യാടി, കോഴിക്കോട്‌ സൗത്ത്‌, കളമശേരി മണ്ഡലങ്ങള്‍ നഷ്‌ടമായതിലാണ്‌ അന്വേഷണ കമീഷനുകള്‍ നടപടിക്ക്‌ ശുപാര്‍ശ ചെയ്തത്. താനൂര്‍, തിരുവമ്ബാടി സീറ്റുകളിലെ തോല്‍വിയിലും സംഘടനാവീഴ്‌ച പരാമര്‍ശിച്ചിട്ടുണ്ട്‌. അതേസമയം നേതൃത്വ – നയപരമായ പ്രശ്‌നങ്ങള്‍ തിരിച്ചടിക്ക്‌ കാരണമായത്‌ റിപ്പോര്‍ട്ടുകളിലില്ല. 27ന് ചേരുന്ന പ്രവര്‍ത്തകസമിതിയില്‍ ഇക്കാര്യം ചര്‍ച്ചയായേക്കും. രാവിലെ 10 ന് കോഴിക്കോട്‌ ലീഗ്‌ ഹൗസിലാണ്‌ യോഗം.
