റാന്നി : ഓട നിര്മ്മാണത്തിനായി സ്ഫോടനം നടത്തി പാറ പൊട്ടിച്ചതോടെ കെട്ടിടങ്ങളുടെ ഭിത്തികള് വിണ്ടു കീറിയതായി പരാതി. റാന്നി വൈക്കം കുത്തുകല്ലുംപടിയില് വ്യാപാര സ്ഥാപനങ്ങള് പ്രവര്ത്തിക്കുന്ന കെട്ടിടങ്ങള്ക്കാണ് നാശം നേരിട്ടത്. പുനലൂര്-മൂവാറ്റുപുഴ സംസ്ഥാനപാതയുടെ നിര്മ്മാണത്തിനായി വശങ്ങളിലെ പാറ പൊട്ടിച്ചതോടെയാണ് ഭിത്തി തകര്ന്നു നാശം നേരിട്ടത്. കഴിഞ്ഞദിവസം ഉച്ചയോടെയാണ് സംഭവം.
റോഡു നിരപ്പാക്കാന് മണ്ണെടുത്തതോടെ തെളിഞ്ഞ പാറ വന് സ്ഫോടനം നടത്തി പൊട്ടിക്കുകയായിരുന്നു. പുതുച്ചിറയില് സാബുക്കുട്ടി ജോയിയുടെ ഉടമസ്ഥയിലുള്ള കെട്ടിടം വാടകയ്ക്കു നല്കിയിരിക്കുകയാണ്. കെ.എസ്.ടി.പിക്കും പഞ്ചായത്തിനും ഉടമ പരാതി നല്കിയിട്ടുണ്ട്. കരാര് കമ്പനിയുടെ തൊഴിലാളികള് കാണിച്ച അനാസ്ഥയ്ക്ക് പരിഹാരം തേടിയലയുകയാണ് ഇപ്പോള് രോഗികൂടിയായ ഉടമ.