കോഴിക്കോട് : ദേശീയ സീനിയർ വനിതാ ഫുട്ബോൾ ടൂർണമെന്റിൽ കേരളത്തിന് തകർപ്പൻ വിജയം. ഗ്രൂപ്പ് ജി യിൽ നടന്ന മത്സരത്തിൽ ഉത്തരാഖണ്ഡിനെ ഒന്നിനെതിരേ മൂന്നുഗോളുകൾക്കാണ് കേരളം തോൽപ്പിച്ചത്. കേരളത്തിനുവേണ്ടി വിനീത വിജയൻ, മാനസ.കെ, ഫെമിന രാഗ് വളപ്പിൽ എന്നിവർ ലക്ഷ്യം കണ്ടപ്പോൾ ഭഗ്വതി ചൗഹാൻ ഉത്തരാഖണ്ഡിന്റെ ആശ്വാസ ഗോൾ നേടി. ആദ്യപകുതി അവസാനിക്കാനിരിക്കേ 44 -ാം മിനിട്ടിൽ വിനീതയിലൂടെ കേരളം മത്സരത്തിൽ ലീഡെടുത്തു. ആദ്യപകുതിയിൽ കേരളം 1-0 ന് മുന്നിൽ നിന്നു. എന്നാൽ രണ്ടാം പകുതിയിൽ 52 -ാം മിനിട്ടിൽ ഭഗ്വതി ഉത്തരാഖണ്ഡിനായി സമനില ഗോൾ നേടിയതോടെ കളി ആവേശത്തിലായി.
ഗോൾ വഴങ്ങിയതോടെ ആക്രമിച്ച് കളിച്ച കേരളം 75 -ാം മിനിട്ടിൽ മാനസയിലൂടെ മുന്നിലെത്തി. 86 -ാം മിനിട്ടിൽ ഫെമിന കേരളത്തിനായി വിജയഗോൾ നേടി. ടൂർണമെന്റിൽ കേരളത്തിന്റെ ആദ്യ വിജയമാണിത്. ആദ്യ മത്സരത്തിൽ കേരളം രണ്ടിനെതിരേ മൂന്ന് ഗോളുകൾക്ക് മിസോറമിനോട് തോറ്റിരുന്നു. ഈ വിജയത്തോടെ കേരളം ക്വാർട്ടർ ഫൈനൽ പ്രതീക്ഷ കാത്തു.