റാന്നി : വടശേരിക്കര-ചിറ്റാർ റോഡില്‍ ബ്രദറുമുക്കില്‍ ഉണ്ടായ വാഹനാപകടത്തിൽ ചുമട്ടു തൊഴിലാളിക്ക് ദാരുണാന്ത്യം. പേഴുംപാറ പത്താം ബ്ലോക്ക് കടവുപുരയ്‌ക്കൽ ദേവസ്യ ആന്റണി (57)ആണ് അപകടത്തിൽ മരണപ്പെട്ടത്. ഇന്നു വൈകീട്ട് ഏഴുമണിയോടെ വടശേരിക്കര മലങ്കര കത്തോലിക്കാ പള്ളിക്ക് സമീപത്ത് അമിതവേഗത്തിലെത്തിയ ഓട്ടോറിക്ഷ സ്‌കൂട്ടറിൽ സഞ്ചരിക്കുകയായിരുന്ന ദമ്പതികളെ റോഡിലേക്ക് ഇടിച്ചിടുകയായിരുന്നു.
പിന്നാലെ തടി കയറ്റി എത്തിയ ലോറിയുടെ ചക്രങ്ങൾ തലയിൽ കയറിയിറങ്ങി ദേവസ്യ തൽക്ഷണം മരണപ്പെടുകയായിരുന്നു. റോഡിലേക്ക് തെറിച്ചുവീണ ഭാര്യ ആശ ജോർജ് ലോറി ഡ്രൈവറുടെ സമയോചിതമായ ഇടപെടൽ മൂലം അത്ഭുതകരമായി രക്ഷപ്പെട്ടു. സ്‌കൂട്ടറിലിടിച്ച ഓട്ടോറിക്ഷ നിർത്താതെ പോയി. വടശേരിക്കര ബൗണ്ടറി മേഖലയിലെ ചുമട്, കയറ്റിറക്ക് തൊഴിലാളിയായ ദേവസ്യ ജോലി കഴിഞ്ഞു വീട്ടുസാധനങ്ങൾ വാങ്ങാനായി ഭാര്യയോടൊത്ത് വടശേരിക്കരയിലേക്ക് പോകുമ്പോഴായിരുന്നു അപകടം. പെരുനാട് പോലീസ് മേൽനടപടികൾ സ്വീകരിച്ചു.
