തിരുവല്ല : സന്ദീപിൻ്റെ കൊലപാതകത്തിലെ പ്രതികളെ എല്ലാം നിയമത്തിന് മുന്നിൽ കൊണ്ടുവരുന്നതിനും പരമാവധി ശിക്ഷ ഉറപ്പു വരുത്തുന്നതിനും വേണ്ടതായ എല്ലാ ശ്രമങ്ങളും സർക്കാർ നടത്തുമെന്ന് മന്ത്രി പി രാജീവ് പറഞ്ഞു. യാതൊരു സംഘർഷവുമില്ലാത്ത ഒരു പ്രദേശത്ത് ഇത്തരത്തിൽ ഒരു കൊലപാതകം നടത്തിയതിന് പിന്നിൽ വ്യക്തമായ രാഷ്ട്രീയമുണ്ട്. അത് നാട് തിരിച്ചറിയും.
കൊല്ലപ്പെട്ട സിപിഐഎം നേതാവ് സന്ദീപ് കുമാറിൻ്റെ വീട്ടിലെത്തി മന്ത്രി കുടുംബാംഗങ്ങളെ ആശ്വസിപ്പിച്ചു. കുടുംബത്തെ സംരക്ഷിക്കുന്നതിന് ആവശ്യമായ നടപടികൾ പാർട്ടി കൈകൊണ്ടിട്ടുണ്ട്. സി പി ഐ എം ജില്ലാ സെക്രട്ടറിയേറ്റംഗം അഡ്വ.ആർ സനൽകുമാർ, തിരുവല്ല ഏരിയാ സെക്രട്ടറി അഡ്വ.ഫ്രാൻസിസ് വി ആൻ്റണി, ഏരിയാ കമ്മറ്റി അംഗം അഡ്വ.പ്രമോദ് ഇളമൺ തുടങ്ങിയവരും രാജീവിനോടൊപ്പം ഉണ്ടായിരുന്നു.