കൊച്ചി : കോഴിക്കോട് ഇരട്ട സ്ഫോടനക്കേസ് അപ്പീല്‍ ഹര്‍ജിയില്‍ ഹൈകോടതിയില്‍ വാദം തുടരും. മൂന്ന് ജീവപര്യന്തം തടവിന് എന്‍.ഐ.എ കോടതി ശിക്ഷിച്ച തടിയന്റവിട നസീറും ഇരട്ട ജീവപര്യന്തം വിധിച്ച നാലാം പ്രതി ഷഫാസും നല്‍കിയ അപ്പീല്‍ ഹരജിയാണ് ഡിവിഷന്‍ ബെഞ്ച് പരിഗണിക്കുന്നത്. അപ്പീലില്‍ വാദം പറയാന്‍ തിങ്കളാഴ്ച നസീറിനെ ബംഗളൂരു പരപ്പന അഗ്രഹാര സെന്‍ട്രല്‍ ജയിലില്‍നിന്ന് ഹൈകോടതിയില്‍ നേരിട്ട് ഹാജരാക്കിയിരുന്നു. അഭിഭാഷകനെ നിയോഗിച്ചതിനെ തുടര്‍ന്ന് ഇയാളെ ജയിലിലേക്ക് മടക്കി അയച്ചു.
ചൊവ്വാഴ്ച ഹര്‍ജി പരിഗണിക്കവേ അഭിഭാഷകനാണ് ഹാജരായത്. ബുധനാഴ്ചയും വാദം തുടരും. എന്‍.ഐ.എക്ക് വേണ്ടി അഡീഷനല്‍ സോളിസിറ്റര്‍ ജനറലാണ് ഹാജരാകുന്നത്. കേസിലെ മൂന്നും ഒമ്പതും പ്രതികളെ കുറ്റമുക്തമാക്കിയതിനെതിരെ എന്‍.ഐ.എ നല്‍കിയ അപ്പീലും ഇതോടൊപ്പം പരിഗണിക്കുന്നുണ്ട്. 2006 മാര്‍ച്ചില്‍ കോഴിക്കോട് കെ.എസ്.ആര്‍.ടി.സി ബസ് സ്റ്റാന്‍ഡിലും മൊഫ്യൂസില്‍ ബസ് സ്റ്റാന്‍ഡിലുമുണ്ടായ സ്ഫോടനവുമായി ബന്ധപ്പെട്ടാണ് കോടതി ശിക്ഷ വിധിച്ചത്.
