സുല്ത്താന് ബത്തേരി : വയനാട് ചെതലയത്തുള്ള ഇന്സ്റ്റിറ്റ്യൂട്ട് ഓഫ് ട്രൈബല് സ്റ്റഡീസ് ആന്ഡ് റിസര്ച് (ഐ.ടി.എസ്.ആര്) കാമ്പസ് നവീകരിക്കുന്നതുമായി ബന്ധപ്പെട്ട് രാഹുല് ഗാന്ധി കേന്ദ്ര ട്രൈബല് വകുപ്പ് മന്ത്രി അര്ജുന് മുണ്ടക്ക് കത്തയച്ചു. കാലിക്കറ്റ് സര്വകലാശാല ചെതലയം കാമ്പസ് നവീകരണത്തിനായി സമര്പ്പിച്ച പദ്ധതിനിര്ദേശവുമായി ബന്ധപ്പെട്ടാണിത്. ഗോത്രവര്ഗ വിദ്യാര്ഥികളുടെ അഭിലാഷങ്ങള് നിറവേറ്റുന്നതിനും കേരളത്തിന്റെ തനത് സംസ്കാരവും പൈതൃകവും പഠനവിധേയമാക്കുന്നതിനുമുള്ള ലോകോത്തര ഗവേഷണസ്ഥാപനം എന്നനിലയില് 2015ല് സ്ഥാപിതമായ ഐ.ടി.എസ്.ആര് നവീകരിക്കുന്നതിന് 2018 ജനുവരി ആറിന് കാലിക്കറ്റ് സര്വകലാശാല വൈസ് ചാന്സലര് ട്രൈബല് അഫയേഴ്സ് മന്ത്രാലയത്തിന് അഭ്യര്ഥന സമര്പ്പിച്ചിരുന്നു.
അധിക അക്കാദമിക് പ്രോഗ്രാമുകള്, അടിസ്ഥാനസൗകര്യ വികസനം, കരിയര് അഡ്വാന്സ്മെന്റ്, പരിശീലനകേന്ദ്രം എന്നിവ സംബന്ധിച്ച നിര്ദേശങ്ങളാണ് സമര്പ്പിച്ചത്. മന്ത്രാലയത്തിന്റെ ഉപദേശപ്രകാരം 2018 ജനുവരി എട്ടിന് കേരളത്തിലെ ഉന്നത വിദ്യാഭ്യാസവകുപ്പിനും കാലിക്കറ്റ് സര്വകലാശാല നിര്ദേശം അയച്ചിരുന്നു. പദ്ധതിയുടെ നിലവിലെ അവസ്ഥയെക്കുറിച്ച് വ്യക്തത നല്കണമെന്നും ഐ.ടി.എസ്.ആറിന്റെ നവീകരണത്തിന് ആവശ്യമായ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.