പുനലൂര്‍ : കാറില്‍ സഞ്ചരിച്ച പിഞ്ചുകുഞ്ഞുങ്ങളടക്കം കുടുംബത്തിന് നേരെ ആക്രമണം. ചുറ്റിക കൊണ്ട് യുവാവിന്റെ തലക്കടിച്ചു. പുനലൂര്‍ കക്കോട് ബദരിയ ഹൗസില്‍ ഹാരിസിനും മക്കളായ രണ്ടു മാസം പ്രായമുള്ള ഇരട്ടക്കുട്ടികളടക്കം ഉള്ളവരെയാണ് മദ്യപിച്ച്‌ ഓട്ടോയില്‍ എത്തിയ മൂന്നംഗ സംഘം ആക്രമിച്ചത്. പെരുന്നാള്‍ ദിവസം രാത്രി ഒമ്പതരയോടെ പുനലൂര്‍ ചൗക്ക റോഡിലായിരുന്നു ആക്രമണം.
ഹാരിസും കുടുംബവും ആദിക്കാട്ടുകുളങ്ങരയില്‍നിന്ന് കാറില്‍ പുനലൂരിലേക്ക് വരികയായിരുന്നു. വണ്‍വേ റോഡില്‍ ട്രാഫിക് തെറ്റിച്ചുവന്ന ഓട്ടോ മുന്നില്‍ എത്തിയപ്പോള്‍ കാര്‍ നിര്‍ത്തി. ഈ സമയം ഓട്ടോയിലുണ്ടായിരുന്നവര്‍ അസഭ്യം വിളിച്ചുകൊണ്ട് തന്നെയും മറ്റുള്ളവരെയും ആക്രമിക്കുകയായിരുന്നെന്ന് ഹാരിസ് പറഞ്ഞു. ഇതിനിടെ ഓട്ടോയിലുണ്ടായിരുന്ന ഒരാള്‍ ചുറ്റികകൊണ്ട് ഹാരിസിന്റെ തലക്കടിച്ചു. മാതാപിതാക്കളായ സബീന, ഷാഹുദീന്‍ എന്നിവരെയും മര്‍ദിച്ചു.
