കൊച്ചി : നടിയെ തട്ടിക്കൊണ്ടു പോയി പീഡിപ്പിച്ചെന്ന കേസില് ജാമ്യം റദ്ദാക്കാന് പ്രോസിക്യൂഷന് നല്കിയ അപേക്ഷയെ എതിര്ത്തു നടന് ദിലീപ് വിചാരണക്കോടതി മുന്പാകെ ഹര്ജി നല്കി. വിചാരണ വേളയില് ദിലീപ് സാക്ഷികളെ സ്വാധീനിച്ചു മൊഴിമാറ്റി, തെളിവുകള് നശിപ്പിച്ചു തുടങ്ങിയ ആരോപണങ്ങള് ഉന്നയിച്ചാണു ജാമ്യം റദ്ദാക്കാന് പ്രോസിക്യൂഷന് അപേക്ഷ സമര്പ്പിച്ചത്. എന്നാല്, ഈ ആരോപണങ്ങള് ദിലീപ് നിഷേധിച്ചു ഇരുപക്ഷത്തിന്റെയും വാദങ്ങള് കോടതി 12 നു വിശദമായി കേള്ക്കും.
ഇതിനു പുറമേ നടിയെ പീഡിപ്പിച്ച ദൃശ്യങ്ങള് അടങ്ങിയ പെന്ഡ്രൈവ് വിശദമായി പരിശോധിക്കാന് ഫൊറന്സിക് സയന്സ് ലാബിലേക്ക് അയയ്ക്കണമെന്ന പ്രോസിക്യൂഷന് അപേക്ഷയും കോടതി അന്നേദിവസം വീണ്ടും പരിഗണിക്കും. കോടതിയുടെ സേഫ് കസ്റ്റഡിയിലിരിക്കെ ഈ ദൃശ്യങ്ങള് ചോര്ന്നതായുള്ള പരാതിയില് അന്വേഷണം നടത്താനാണു പെന്ഡ്രൈവ് വിശദമായി പരിശോധിക്കാന് പ്രോസിക്യൂഷന് അപേക്ഷ നല്കിയത്. എന്നാല് ഇക്കാര്യത്തില് വ്യത്യസ്ത നിലപാടാണു വിചാരണക്കോടതി സ്വീകരിച്ചത്. ദൃശ്യങ്ങള് ഒരു തവണ പരിശോധിച്ച സൈബര് വിദഗ്ധനെ സാക്ഷിയായി വിസ്തരിച്ച കാര്യം കോടതി ചൂണ്ടിക്കാട്ടി.