റാന്നി : പ്ലാച്ചേരി മുക്കട റോഡില് നടന്ന വാഹനാപകടത്തില് യുവാവിന് ദാരുണാന്ത്യം. പ്ലാച്ചേരിയില് താമസിക്കുന്ന ആലായില് സാബു-സിന്ധു ദമ്പതികളുടെ മകന് സഞ്ജു തോമസ്(23) ആണ് മരിച്ചത്. ഇന്ന് ഉച്ചയ്ക്ക് പന്ത്രണ്ടോടെ മുക്കടയില് നിന്നും പ്ലാച്ചേരിക്ക് കാറില് വരുമ്പോഴാണ് ദുരന്തമുണ്ടായത്. റോഡിനു താഴ്ചയിലെ കുഴിയിലേക്ക് കാര് തലകുത്തനെ മറിയുകയായിരുന്നു. ഓടി കൂടിയ നാട്ടുകാരും റാന്നിയില് നിന്നെത്തിയ അഗ്നിശമന സേനാഗംങ്ങളും ചേര്ന്ന് യുവാവിനെ കാഞ്ഞിരപ്പള്ളി ആശുപത്രിയിലെത്തിച്ചെങ്കിലും മരണമടയുകയായിരുന്നു.
റോഡിനു വശത്തെ ഇടിതാങ്ങിയില് തട്ടിയ ശേഷം ഇതില്ലാത്ത ഭാഗത്തു കൂടി കുഴിയിലേക്ക് പതിക്കുകയായിരുന്നു. പിക്കപ്പ് ഡ്രൈവറായ സഞ്ജു അവിവാഹിതനാണ്. മൃതദേഹം കാഞ്ഞിരപ്പള്ളി താലൂക്ക് ആശുപത്രി മോര്ച്ചറിയില്. മണിമല പോലീസും പ്ലാച്ചേരി വനം സ്റ്റേഷനിലെ വനപാലകരും സ്ഥലത്തെത്തിയിരുന്നു. സഹോദരങ്ങള് സുബാഷ്, ആരോമല്.