കോഴിക്കോട് : സ്വകാര്യ ആശുപത്രിയിലെ വനിതാ ഡോക്ടര്‍ക്ക് നേരെ ലൈംഗികാതിക്രമത്തിന് ശ്രമിച്ച യുവാവിനെ അറസ്റ്റ് ചെയ്തു. മണ്ണഞ്ചേരി വലിയവീട് അനുഗ്രഹാലയത്തില്‍ അമ്പാടി കണ്ണനെയാണ് (27) മണ്ണഞ്ചേരി പോലീസ് അറസ്റ്റ് ചെയ്തത്. കാവുങ്കലിലെ സ്വകാര്യ ആശുപത്രിയില്‍ ഞായറാഴ്ച പുലര്‍ച്ച 12.50നാണ് സംഭവം. കാലിന് സുഖമില്ലെന്ന് പറഞ്ഞ് ചികിത്സക്കായി ആശുപത്രിയില്‍ എത്തിയ ഇയാള്‍ വനിതാ ഡോക്ടര്‍ പരിശോധിക്കാന്‍ എത്തിയപ്പോള്‍ ലൈംഗികമായി അതിക്രമിക്കാന്‍ ശ്രമിക്കുകയായിരുന്നു .
ഇതിനൊപ്പം ആശുപത്രി ജീവനക്കാരെ മര്‍ദിക്കാനും ശ്രമിച്ചു. പിന്നീട് പോലീസെത്തിയാണ് ഇയാളെ കസ്റ്റഡിയിലെടുത്തത്. ആശുപത്രിയില്‍ ബഹളമുണ്ടാക്കിയതിനും വനിതാ ഡോക്ടറെ ആക്രമിക്കാന്‍ ശ്രമിച്ചതിനുമാണ് കേസെടുത്തത്. ഇയാള്‍ക്കെതിരെ മുമ്പും സമാനമായ കേസ് രജിസ്റ്റര്‍ ചെയ്തിട്ടുണ്ടെന്നും പോലീസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
